„მსვლელობა თავისუფლებისთვის” მონაწილეების ნაწილი საპროტესტო აქციას მთავრობის ადმინისტრაციასთან მართავს. პარლამენტთან მიმდინარე აქციის მონაწილეთა ნაწილმა მთავრობის ადმინისტრაციასთან გადაინაცვლა. აქციის მონაწილეები სკანდირებენ „მონებო”.
ოპოზიციონერი ლიდერების განცხადებით, თავიანთ მოთხოვნებს ისინი იმ შენობასთან გააჟღერებენ, სადაც პრემიერ-მინისტრი და მთავრობის კაბინეტის წარმომადგენლები იმყოფებიან.
„ევროპული საქართველოს“ერთ-ერთმა ლიდერმა გიგი უგულავამ აქციის მონაწილეებს მიმართა. უგულავამ პოლიცია გააკრიტიკა და აღნიშნა, რომ საქართველოს პოლიციის ფორმაში ჩაცმული ბანდა არ სჭირდება.
„სამწუხაროდ, ჩვენი პოლიცია „ოპრიჩნიკების“ ბრიგადა გახდა, რომელიც მარტო ივანიშვილის და ღარიბაშვილის ხუშტურებს ექვემდებარება. მათი ადგილი თავისუფალი საქართველოს პოლიციაში არ იქნება“,-აღნიშნა უგულავამ.
ადგილზე მობილიზებული არიან სამართალდამცავები.