ფეხბურთელ გიორგი შაქარაშვილის მკვლელობაში ბრალდებული მორაგბის, არჩილ გაგნიძის ადვოკატის, ვასილ მამულაშვილის განცხადებით, ბრალდებულები საბოლოო სიტყვაში იმ რეალობაზე ისაუბრებენ, რაც მცხეთაში, შემთხვევის ღამეს მოხდა.
მამულაშვილი ასევე განმარტავს, თუ რატომ არ მისცა 5 ბრალდებულიდან სამმა სასამართლოში ჩვენება.
“ ბრალდებულები იტყვიან იმას, რასაც ფიქრობენ, არანაირი მომზადება, დალაგება არ მომხდარა, ისაუბრებენ იმაზე, რაც რეალურად მოხდა. შესაბამისად, მოლოდინი გვაქვს, რომ სასამართლო დღესვე გამოიტანს განაჩენს და ეს უალტერნატივოდ იქნება გამამართლებელი.
რაც შეეხება იმას, თუ რატომ არ მისცეს სასამართლოში ჩვენება, ეს ბრალდებულების უფლებაა, პროკურატურა ფაქტობრივად შეურაცხყოფას ახდენდა და დაკითხვის ფორმა დაკავებულებისთვის მიუღებელი იყო. გარდა ამისა, საბოლოო სიტყვას მტკიცებულებითი ფასეულობა აქვს",- განაცხადა მამულაშვილმა.
ცნობისთვის, ფეხბურთელ გიორგი შაქარაშვილის განზრახ ჯგუფურად მკვლელობას არჩილ გაგნიძეს, ნიკოლოზ რევაზიშვილს, ვახტანგ ჩიქოვანს, ზ.ხ-ს და ა.ქ.-ს ედავებიან.