ჩვენი კოლეგის ლევან იოსელიანის მხრიდან ორმაგ თუ სამმაგ სტანდარტს აქვს ადგილი - თუკი მას მართლაც გული შესტკივა და არჩევნების გაყალბებასთან დაკავშირებული ფაქტები აქვს, პარლამენტის საგამოძიებო კომისიას წარუდგინოს, - ეს განცხადება ლევან იოსელიანის მისამართით პლენარულ სხდომაზე „ქართული ოცნების“ დეპუტატმა ალუდა ღუდუშაურმა მას შემდეგ გააკეთა, რაც იოსელიანმა შს მინისტრს ვახტანგ გომელაურს შეკითხვა 31 ოქტომბრის არჩევნების გაყალბებაზე დაუსვა.
ღუდუშაურმა იოსელიანს პარლამენტის საგამოძიებო კომისიის საქმიანობაში ჩართვისკენ და კომისიისთვის კონკრეტული ფაქტების წარდგენისკენ მოუწოდა. მან ასევე იმედი გამოთქვა, რომ შს სამინისტრო საკუთარი კომპეტენციის ფარგლებში კომისიასთან აქტიურად ითანამშრომლებს.
„ლევან იოსელიანი მტკიცებით ფორმაში საუბრობდა. თითქოს არგუმენტებიც მოიშველია. ჩაერთოს საგამოძიებო კომისიის მუშაობაში და შესაბამისი რეაგირება მოვახდინოთ, თუკი დარღვევა მართლაც იყო. სხვა შემთხვევაში, პოპულიზმს საშუალება არ უნდა მივცეთ“, - განაცხადა ალუდა ღუდუშაურმა პლენარულ სხდომაზე.