6 მარტს, „ევროპის უნივერსიტეტისა" და საფრანგეთის საელჩოს ორგანიზებით, ესეების კონკურსის პირველი ეტაპი გაიმართება. როგორც „ინტერპრესნიუსს“ „ევროპის უნივერსიტეტიდან“ აცნობეს, კონკურსის მონაწილეებს საფრანგეთის ელჩი დიეგო კოლასი და „ევროპის უნივერსიტეტის" რექტორი ნინო ტალიაშვილი მიესალმებიან.

ღონისძიებას ასევე დაესწრება საქართველოს განათლების, მეცნიერების, კულტურისა და სპორტის სამინისტროს იურიდიული დეპარტამენტის უფროსი დავით ლომინაშვილი.

„ევროპის უნივერსიტეტისა" და საფრანგეთის საელჩოს ორგანიზებული ესსეების კონკურსი ტარდება თემაზე „საქართველოს ევროპული მომავალი". კონკურსში მონაწილეობენ მე-11 - მე-12 კლასის მოსწავლეები, როგორც კერძო, ასევე საჯარო, ზოგადსაგანმანათლებლო სკოლებიდან და მის მიზანს წარმოადგენს, ევროპული ღირებულებების პოპულარიზაცია და მოსწავლეებში ევროინტეგრაციის პროცესებისადმი, ევროპულ ოჯახთან საქართველოს დაახლოების მნიშვნელობისადმი ცნობადობის ამაღლება, დემოკრატიის, ადამიანის უფლებებისა და კანონის უზენაესობის, როგორც ევროპული ღირებულებების გააზრება. კონკურსში რეგისტრირებულია 300-მდე მოსწავლე მთელი საქართველოს მასშტაბით, მათ შორის, მაღალმთიანი რეგიონებიდან. მათ აქვთ შესაძლებლობა ესსე დაწერონ როგორც ფიზიკურად: თბილისსა და ქუთაისში, ასევე, ონლაინ zoom-ის საშუალებით. აღსანიშნავია, რომ კონკურსი „ევროპის დღეები 2021"-ის ფარგლებში ტარდება და გამარჯვებულიც, სიმბოლურად, 9 მაისს, "ევროპის დღეს" გამოვლინდება.

დაჯილდოების ცერემონია საფრანგეთის საელჩოს რეზიდენციაში გაიმართება.