“ქართული ოცნების” თავმჯდომარის, მამუკა მდინარაძის განცხადებით, საქართველოში მხოლოდ ჯანდაცვის მსოფლიო ორგანიზაციის მიერ ავტორიზებული კორონავირუსის ვაქცინა შემოვა. ამის შესახებ მან პოლიტსაბჭოს სხდომის დასრულების შემდეგ, პარტიის ოფისში გამართულ ბრიფინგზე განაცხადა.

როგორც მამუკა მდინარაძე აცხადებს, პოლიტსაბჭოს სხდომაზე საუბარი იყო ვაქცინაციაზე. როგორც ის აცხადებს, „ამ თვის ბოლო იქნება ის მაქსიმალური ვადა, რომლის განმავლობაში ეტაპობრივად უნდა შემოვიდეს ვაქცინა“.

„შევპირდით საქართველოს მოქალაქეებს, რომ საუბარი იქნება მხოლოდ და მხოლოდ ჯანდაცვის მსოფლიო ორგანიზაციის მიერ ავტორიზებულ ვაქცინაზე. იმისთვის, რომ მართლები ვიყოთ საზოგადოებაში, ამ თვის ბოლო იქნება ის მაქსიმალური ვადა, რომლის განმავლობაში ეტაპობრივად უნდა შემოვიდეს ვაქცინა. საუბარია „ფაიზერსა“ და „ასტრაზენეკაზე“, სხვა მიმართულებითაც სწორად მიდის მუშაობა, ავტორიზებული ვაქცინა შემოვა საქართველოში. ეტაპობრივად მოხდება, პირველ რიგში, სამედიცინო პერსონალის აცრა, შემდეგ კი გაწერილი გეგმის მიხედვით“,-აცხადებს მდინარაძე.