“ქართული ოცნების” თავმჯდომარის მამუკა მდინარაძის განცხადებით, „ერთიანი ნაციონალური მოძრაობის“ თავმჯდომარეს ნიკა მელიას შეუძლია საპატიმრო ნებისმიერ წუთს დატოვოს, „ეს მხოლოდ მის მოქმედებაზე და ნებაზეა დამოკიდებული“.

პოლიტსაბჭოს სხდომის დასრულების შემდეგ, მამუკა მდინარაძემ ჟურნალისტებთან ნიკა მელიას საქმეზე ისაუბრა. როგორც მამუკა მდინარაძემ ჟურნალისტებთან საუბრისას განაცხადა, მმართველ გუნდში საერთაშორისო პარტნიორების მხრიდან წნეხს ვერ გრძნობენ.

„ჩვენ უდიდეს მხარდაჭერას ვგრძნობთ ჩვენი პარტნიორების მხრიდან, რომ ქართული სახელმწიფოს ინტერესები იყოს პრიორიტეტული და ყველაზე მაღალ რეგისტრში აყვანილი და არა რომელიმე კონკრეტული პოლიტიკური პარტიის. სახელმწიფოს ინტერესები ემთხვევა ყველაზე უფრო პრაგმატულ და კომპრომისულ წინადადებებს, რომლის შედეგი დიალოგი უნდა იყოს, რასაც არ აქვს ალტერნატივა. რაც შეეხება ნიკა მელიას, მარტივად შეგვიძლია ვთქვათ, ყოველ წუთს მას საშუალება აქვს დატოვოს საპატიმრო, ეს მხოლოდ მის მოქმედებაზე და ნებაზეა დამოკიდებული“,-აცხადებს მამუკა მდინარაძე.