მოძრაობა „საქართველოსთვის“ აქტივისტებმა პრემიერ-მინისტრ ირაკლი ღარიბაშვილის სახლთან აქცია გამართეს.

აქციის მონაწილეებმა საღებავებით ასფალტზე წარწერები გააკეთეს -“ჰაკიმ წადი!“, „სიმამრიჩი“.

აქციის მონაწილეები რამდენიმე დღის წინ, ტელეკომპანია „პირველის“ ეთერში გასულ აუდიოჩანაწერებს აპროტესტებდნენ და ისინი ირაკლი ღარიბაშვილის გადადგომას ითხოვდნენ.

ადგილზე მობილიზებული იყო საპატრულო პოლიციის ეკიპაჟები.

ცნობისთვის, საქართველოს გენერალურმა პროკურატურამ გავრცელებულ ფარულ ჩანაწერებთან დაკავშირებით გამოძიება დაიწყო. უწყების ინფორმაციით, სისხლის სამართლის საქმე კერძო საუბრის უნებართვო ჩაწერის ან/და მიყურადების, ასევე კერძო კომუნიკაციის ჩანაწერის, ტექნიკური საშუალებით მოპოვებული ინფორმაციის უკანონოდ გამოყენებისა და გავრცელების ფაქტებზე აღიძრა.

საუბარია „ტვ პირველის" მიერ გავრცელებულ ჩანაწერებზე, რომლითაც, მათივე მტკიცებით, მომღერალი ბერა ივანიშვილი, სავარაუდოდ, სახელმწიფო დაცვის სპეციალური სამსახურის ამჟამინდელ ხელმძღვანელს ანზორ ჩუბინიძეს იმ ახალგაზრდების დასჯას სთხოვს, რომელთაც ინტერნეტში ივანიშვილების შეურაცხმყოფელი კომენტარები დაწერეს. ამასთან, ტელეკომპანიის მიერ გავრცელებული ჩანაწერის მიხედვით, ბერა ივანიშვილი ამ საკითხზე ირაკლი ღარიბაშვილთან საუბრობს, რომელიც ამ ქმედებებს იწონებს.