11 მარტს, „მრავალეროვანი საქართველო“ (PMMG) საარჩევნო კანონმდებლობაში შესატან ცვლილებებთან დაკავშირებით, სასტუმრო „მუზეუმში“ ეთნიკური უმცირესობების საკითხებზე მომუშავე არასამთავრობო ორგანიზაციებთან შეხვედრას გამართავს.
მათივე ცნობით, არასამთავრობო სექტორის წარმომადგენლები ქვემო ქართლიდან, სამცხე-ჯავახეთიდან და კახეთიდან, საქართველოს პარლამენტის საარჩევნო რეფორმის სამუშაო ჯგუფში, „მრავალეროვანი საქართველოს“ მიერ წარდგენილ საარჩევნო კანონმდებლობაში შესატან ცვლილებებსა და რეკომენდაციების შესახებ იმსჯელებენ.
„მრავალეროვან საქართველოში“ აცხადებენ, რომ შეხვედრის მონაწილეებს შესაძლებლობა ექნებათ წარმოადგინონ საკუთარი ხედვები, რაც, მათი აზრით, ერთი მხრივ გააუმჯობესებს საარჩევნო გარემოს, ხოლო, მეორე მხრივ, ხელს შეუწყობს ეთნიკური უმცირესობების პოლიტიკური წარმომადგენლობისა და ჩართულობის გაზრდას აღნიშნულ პროცესში.
მათი ინფორმაციით, 8 თებერვლიდან „მრავალეროვანი საქართველო“ ჩართულია საქართველოს პარლამენტის საარჩევნო რეფორმის სამუშაო ჯგუფის საქმიანობაში, რომლის მიზანიცაა საარჩევნო კანონმდებლობაში შესატანი ცვლილებების პროექტის შემუშავება.