ვიცავთ წესებს და დეტალებზე არ ვსაუბრობთ, თუმცა, ეს არ ნიშნავს იმას, რომ პასუხების გაცემა ჩვენ დღესვე არ შეგვიძლია თითოეულ პუნქტთან მიმართებაში,- ამის შესახებ პარლამენტის თავმჯდომარე არჩილ თალაკვაძემ ევროსაბჭოს პრეზიდენტის შარლ მიშელის სპეციალურ წარმომადგენელთან, კრისტიან დანიელსონთან შეხვედრის დასრულების შემდეგ, მედიასთან განაცხადა.
კითხვაზე, თუ იყო შეთავაზებული კონკრეტული წინადადებები უშუალოდ მედიატორის მხრიდან, თალაკვაძე აცხადებს, რომ მათ კონკრეტული საკითხები განიხილეს, რომლის დეტალებსაც საზოგადოებას ღიად მოუყვებიან.
"ჩვენ განვიხილეთ ძალიან კონკრეტული საკითხები, რომლის დეტალებზეც ჩვენ საზოგადოებას ძალიან ღიად მოვუყვებით და საზოგადოება დარწმუნდება, თუ რამდენად სამართლიანი და კონსტრუქციული გადაწყვეტილებები და ამ პროცესის მოგვარების გზები იყო შეთავაზებული ხელისუფლების მხრიდან. დღეს ვიცავთ წესებს, რაზეც შევთანხმდით მოლაპარაკების წინ და ამ დეტალებზე არ ვსაუბრობთ, თუმცა, ეს არ ნიშნავს იმას, რომ პასუხების გაცემა ჩვენ დღესვე არ შეგვიძლია თითოეულ პუნქტთან მიმართებაში, რომელიც განიხილებოდა ამ ორი - სამი დღის განმავლობაში", - განაცხადა თალაკვაძემ.