საქართველოს ტერიტორიების საწინააღმდეგოდ ჩადენილ ქმედებებში ბრალდებული ივერი მელაშვილი სპეციალურ პენიტენციურ სამსახურში გამოკითხვაზე იმყოფება. აღნიშნულის შესახებ „ინტერპრესნიუსს“ მელაშვილის ადვოკატმა ედუარდ მარიკაშვილმა განუცხადა.
როგორც მარიკაშვილი განმარტავს, ივერი მელაშვილის გამოკითხვა სახალხო დამცველის მიერ მელაშვილის უფლებების დარღვევის ფაქტის დადგენას ეხება.
ადვოკატის თქმითვე, საუბარია, მასსა და ივერი მელაშვილს შორის კომუნიკაციის კონფიდენციალურობის დარღვევაზე.
ცნობისთვის, სახალხო დამცველის ინფორმაციით, სახალხო დამცველმა ბრალდებულ ივერი მელაშვილის ადვოკატთან კონფიდენციალური კომუნიკაციის უფლების დარღვევა დაადგინა და 2021 წლის 28 იანვარს იუსტიციის მინისტრს N8 პენიტენციური დაწესებულების თანამშრომელთა დისციპლინური პასუხისმგებლობის დაკისრების წინადადებით მიმართა.
„სახალხო დამცველის რწმუნებულთა მიერ შედგენილი ოქმებით, N8 დაწესებულებიდან მოპოვებული დოკუმენტაციისა და სხვა მასალების შესწავლის შედეგად დადგინდა, რომ 2020 წლის 30 დეკემბერს ივერი მელაშვილი შეხვდა ადვოკატს, რომელთანაც განიხილავდა დაცვის სტრატეგიის საკითხებს. მან ადვოკატის მიწოდებულ რუკებზე გააკეთა კომენტარები მინაწერის სახით და ითხოვა მასალების ადვოკატისთვის გადაცემა. ადვოკატისთვის დოკუმენტაციის გადაცემის ნაცვლად, დაწესებულების თანამშრომლები შინაარსობრივად გაეცნენ კომენტარებს და მხოლოდ ამის შემდეგ შესთავაზეს ადვოკატს რუკების ჩაბარება“, - ნათქვამია სახალხო დამცველის მიერ გავრცელებულ განცხადებაში.