ჩვენ ძალით არავის ვეხვეწებით პარლამენტში შემოსვლას, თუმცა ის საკითხები, რაც პრეზიდენტ მიშელთან ოპოზიციამ დააყენა, ავტომატურად მოითხოვს პარლამენტში ჩართულობას, - ამის შესახებ პარლამენტის თავმჯდომარემ, არჩილ თალაკვაძემ კრისტიან დანიელსონთან შეხვედრის შემდეგ განაცხადა.
როგორც პარლამენტის თავმჯდომარემ აღნიშნა, „პარლამენტში მონაწილეობა არის ღირსება და პატივი და არა თემა, რომელზეც ვინმეს ეხვეწებიან, რომ ჩაერთოს და მონაწილეობა მიიღოს“.
„ჩვენი მხრიდან სამართლიანი, კონსტრუქციული პოზიციები იყო დაყენებული თავიდანვე. სწორედ ამან მისცა საშუალება ამ პოლიტიკურ დიალოგს, რომ გაგრძელებულიყო. მაქვს მოლოდინი, რომ ოპოზიცია პრაგმატულ ნაბიჯებს გადადგამს. გარდა იმისა, რომ ეს ქვეყნის ინტერესებშია, მათ ინტერესებშიც არის, რომ ეს შეთანხმება შედგეს და ოპოზიცია ქუჩიდან დაბრუნდეს პოლიტიკურ პროცესში. ჩვენ ძალით არავის ვეხვეწებით პარლამენტში შემოსვლას, თუმცა ის საკითხები, რაც პრეზიდენტ მიშელთან ოპოზიციამ დააყენა, ავტომატურად მოითხოვს პარლამენტში ჩართულობას. პარლამენტი არის ჩვენი ქვეყნის კონსტიტუციური ინსტიტუტი და რა თქმა უნდა, პარლამენტში მონაწილეობა არის ღირსება და პატივი და არა თემა, რომელზეც ვინმეს ეხვეწებიან, რომ ჩაერთოს და მონაწილეობა მიიღოს. სწორედ ამ განცდით უნდა ვიმუშაოთ პარლამენტში. მოვისმინეთ კომენტარები, რომ ეს არის გარდამავალი, დროებითი პარალამენტი. მეგობრებო, მსოფლიოში ყველა პარლამენტი არის დროებითი და გარდამავალი. 4 წელიწადში ყოველთვის არის არჩევნები და იცვლება პარლამენტის შემადგენლობაც. პარლამენტის დაკნინებას ნუკი ვეცდებით, ვცადოთ, რომ ჩვენი ინსტიტუტების კონსოლიდაცია მოვახდინოთ“, - განაცხადა თალაკვაძემ.