გია ხუხაშვილი - თუ რიგგარეშე არჩევნებზე მხარეები შეთანხმდნენ, მოვუწოდებდი ნიკა მელიას, გირაო გადაიხადოს

შიში არის მთავარი მოტივატორი ხელისუფლების პოლიტიკური ტაქტიკის დაგეგმის დროს - სანამ შუამავლები აქ არიან ვიყოთ ტკბილები და მურაბები, როგორც კი თვითმფრინავში ჩასხდებიან და გაფრინდებიან, ჩვენ შევპირდეთ და ბიძინა „გადააგდებს“, - ამის შესახებ პოლიტოლოგმა გია ხუხაშვილმა „პალიტრანიუსის“ გადაცემაში „ნიუსრუმი“ ხელისუფლებასა და ოპოზიციას შორის მიმდინარე მოლაპარაკებებზე საუბრისას განაცხადა.

მისივე თქმით, კრისტიან დანიელსონი ხელისუფლებას ამ „ვირეშმაკობას“ მიუხვდა და გადაწყვეტილების მიღებამდე დარჩენა გადაწყვიტა, რის შემდეგაც „ტრიუკების ტარება ძალიან რთულია“.

,,ხელისუფლებას აქვს მოქმედებების გარკვეული ტაქტიკა, მათთვის მთავარი პრობლემაა, რომ არ აჩვენონ სისუსტე და მუდმივად იყვნენ ძალისმიერი მოქმედებების რეჟიმში. მიაჩნიათ, რომ როგორც კი სისუსტეს გამოავლენენ ყველაფერი ჩამოეშლებათ. შიში არის მთავარი მოტივატორი ხელისუფლების პოლიტიკური ტაქტიკის დაგეგმის დროს, სანამ შუამავლები აქ არიან უნდა ვიყოთ ტკბილები და მურაბები, როგორც კი თვითმფრინავში ჩასხდებიან და გაფრინდებიან, ჩვენ შევპირდეთ და ბიძინა „გადააგდებს“. შარლ მიშელი რომ ჩამოვიდა ღარიბაშვილი იჯდა ძალიან კონსტრუქციულად შეხვედრებზე, როგორც კი გაფრინდა, ისევ გამოვიდა და თვალების ბრიალი და ფეხების ბაკუნი დაიწყო. ახლაც ასე იყო დაგეგმილი, ჩათვალეს, რომ დანიელსონი გაისტუმრეს. პატარა „ფოლს სტარტი“ მოუვიდა კობახიძეს ამ თემასთან დაკავშირებით, ჯერ უნდა გაფრენილიყო და მერე ეძახა რაც იძახა.

დანიელსონმა ბოლო დროს აღარ „ჭამა“ ეს ყველაფერი, მიუხვდა ამ ვირეშმაკობას ხელისუფალს და ვთქვა, რომ ვრჩები სანამ გადაწყვეტილება არ იქნება მიღებული. ამის შემდეგ ძალიან რთულია „ტრიუკების“ ტარება. მოლაპარაკებების ამ ეტაპზე იმის მტკიცებას ვინ მართალია და ვინ მტყუანი, აზრი არ აქვს, ჩვენ წინ უნდა წავიწიოთ. როდესაც ერთ-ერთი მხარე იწყებს მიზეზების აქტუალიზაციას, ამ მხარეს არ უნდა თემის გადაწყვეტა. კობახიძის გუშინდელი გამოსვლა იყო მოლაპარაკებების აფეთქების დაანონსება, ვილაპარაკოთ იმაზე რას ვაკეთებთ და არა იმაზე, რომ ვიღაცები არიან „კრიმინალები“. თუ მართლაც ასეა „კრიმინალებთან“ ზიხარ და მოლაპარაკებებს აწარმოებ?“ - აღნიშნა გია ხუხაშვილმა.

გია ხუხაშვილის აზრით, თუ მხარეები რიგგარეშე არჩევნებზე რაიმე ფორმულით შეთანხმდებიან ნიკა მელიამ გირაო უნდა გადაიხადოს და ამ გზით დატოვოს საპატიმრო.

"თუ რიგგარეშე არჩევნებზე რაღაც ფორმულით მხარეები შეთანხმდნენ, მოვუწოდებდი კიდეც მელიას, რომ გადაიხადოს გირაო. მესმის მისი პოლიტიკური დემარშის მიზანი და არ ვაკრიტიკებ. თუ მისი ამოცანა იყო, რომ რაღაც შეცვლილიყო ქვეყანაში და რიგგარეშე არჩევნები მიღწეულ იქნა, გადაიხადოს გირაო და გამოვიდეს, შედეგი ხომ მიღწეული იქნება. ქუჩაში დარჩება ოპოზიცია თუ შევა, რიგგარეშე არჩევნები მაინც გარდაუვალია. შეუძლებელია ეს სახელისუფლებო დაჯგუფება იყოს დიდი ხნით სიცოცხლისუნარიანი, მიუხედავად იმისა, რომ ოპოზიციაც სუსტია და დიდი პრობლემები აქვს, ესენი ვერ მართავენ ქვეყანას. მარტივად შეიძლება „ნამახვანჰესსაც“ გადაყვნენ და ოპოზიცია არ იყოს საჭირო ისე დაემხოს ეს ხელისუფლება. მელიას დაკავებაც საკმარისია იმ დასკვნის გასაკეთებლად, რომ ჩვენი ხელისუფლება ქვეყანას მართავს რუსული მოდელით“, - განაცხადა გია ხუხაშვილმა.

ემილ ავდალიანი - სამხრეთ კავკასიის რეგიონმა დიდი ძალების მეტოქეობის ხანაში შეაბიჯა, დღეს თამაშის ახალი წესები ყალიბდება,  მტკივნეული და გარდამავალი პერიოდია
ქართული პრესის მიმოხილვა 14.04.2021
როგორ ჩატარდება ერთიანი ეროვნული გამოცდები? - შარშანდელ რეკომენდაციებში შესაძლოა, კორექტირება შევიდეს - ინტერვიუ სოფიო გორგოძესთან
გიორგი კეკელიძის ახალი ინიციატივა: აპრილი წიგნის ჩუქების თვედ გამოცხადდეს
თანაბარი განათლება მაღალმთიანი სოფლების ბავშვებს
ვასილ ხოდელი - ლიბერთის ნებისმიერი სესხი გაიცემა საბაზრო პირობებით