ირანში ცეცხლის ტრადიციული ფესტივალის დროს მომხდარი ინციდენტების დროს დაიღუპა 10 და დაშავდა ასობით ადამიანი, - ამის შესახებ ინფორმაციას Associated Press-ი ირანულ მედიაზე დაყრდნობით ავრცელებს.

გამოცემის ცნობით, სახელმწიფო ტელევიზიამ მსხვერპლის შესახებ ინფორმაცია დღეს გაავრცელა, თუმცა საინფორმაციო სააგენტოები იუწყებიან, რომ ეს შემთხვევები ბოლო რამდენიმე კვირის განმავლობაში მოხდა და ბევრი მათგანი ფოიერვერკების დამზადებას უკავშირდება.

გავრცელებული ინფორმაციით, თითქმის 1 900 დაშავებულიდან 200-ზე მეტი ადამიანი საავადმყოფოში გადაიყვანეს. ამასთან, წუხელ სასწრაფო დახმარების და სამაშველო ბრიგადების მანქანები დაზიანდა და სამართალდამცავებმა კანონისა და წესრიგის უგულებელყოფის გამო ათობით ადამიანი დააკავეს.

აღსანიშნავია, რომ დაშავებული ადამიანების თითქმის ნახევარი 16 წლამდე პირია.

ცეცხლის ყოველწლიური ფესტივალი ირანულ ახალ წლამდე, ნოვრუზამდე უკანასკნელ სამშაბათს ღამით აღინიშნება. რიტუალის ისტორია ჩვენს წელთაღრიცხვამდე დაახლოებით 1700 წლიდან იღებს სათავეს.