ყოველთვის, როდესაც "ნაციონალური მოძრაობა" მძიმე მდგომარეობაში ვარდება, ხან საკუთარ ოფისებს წვავენ, ხან საკუთარ პლაკატებს ებრძვიან,- ამის შესახებ "ქართული ოცნების" თავმჯდომარემ ირაკლი კობახიძემ ჟურნალისტებს განუცხადა.

კობახიძე დარწმუნებულია, რომ საქმეზე გამოძიებას შედეგი ექნება.

"ამასთან დაკავშირებით რაღაც ინფორმაცია მაქვს, თუმცა ყველაფერი შესაბამისმა უწყებებმა უნდა განაცხადონ, როგორ წარიმართება გამოძიების პროცესი. დარწმუნებული ვარ, რომ გამოძიებას ექნება შედეგი. მგონია, რომ გამოძიება წარმატებით წარიმართება. მე ეს მგონია იმ ინფორმაციიდან გამომდინარე, რაც მაქვს", - განაცხადა ირაკლი კობახიძემ.

ჟურნალისტის კითხვაზე, "თვითონ ესროლეს საკუთარ პლაკატს?" კობახიძე ასე პასუხობს:

"სხვა ლოგიკა სად არის?! რომელ სულელს უნდა მოუვიდეს თავში ის, რომ ოპონენტმა ესროლოს "ნაცმოძრაობის" პლაკატს. დღეს, კითხვები ისმება იმასთან დაკავშირებით, რომ "ნაცმოძრაობის" პლაკატი დაჭრეს და "ნაცმოძრაობას" ერჩის "ქართული ოცნება", სისულელეა", - განაცხადა კობახიძემ.

კითხვაზე, საიდან აქვს ინფორმაცია ნიკა მელიას პლაკატის დაზიანების გამოძიებასთან დაკავშირებით, კობახიძე პასუხობს, რომ სათანადო წესით მოიკითხეს.

"მოვიკითხეთ სათანადო წესით, როგორც არის ეს საჭირო, როგორც ეს შეუძლია პარლამენტის წევრს მოიკითხოს გარკვეული საკითხები, ასე გვაქვს მოკითხული და იმედი გვაქვს, რომ წარმატება იქნება", - განაცხადა ირაკლი კობახიძემ.