ინფექციური საავადმყოფოს დირექტორი თენგიზ ცერცვაძე აცხადებს, რომ მიესალმება საქართველოს პრეზიდენტის, სალომე ზურაბიშვილის გადაწყვეტილებას, ჩაეტარებინა COVID-19 - ის საწინააღმდეგო ვაქცინაცია ღია ეთერში.
„ქალბატონო სალომე, უდიდესი პატივისცემით გილოცავთ საიუბილეო თარიღს! დიდია თქვენი როლი ახალი დემოკრატიული საქართველოს მშენებლობასა და მის საერთაშორისო აღიარებაში.
მივესალმები თქვენს გადაწყვეტილებას, ჩაგეტარებინათ COVID-19 - ის საწინააღმდეგო ვაქცინაცია ღია ეთერში.
COVID-19 21-ე საუკუნის უდიდესი გამოწვევაა და მასთან გამკლავება აუცილებელი პირობაა, რათა საქართველო რაც შეიძლება ჩქარა დაუბრუნდეს ცხოვრების ნორმალურ პირობებს. პანდემიის დამარცხება კი შეუძლებელია მოსახლეობის საყოველთაო ვაქცინაციის გარეშე.
დღეს ქვეყანაში შეიმჩნევა COVID-19- ის ვაქცინაციისადმი ნდობის დეფიციტი, რაც კითხვის ნიშნის ქვეშ აყენებს შედარებით მოკლე დროში ქვეყანაში ფართომასშტაბიანი ვაქცინაციის შესაძლებლობას. ამ პირობებში უდიდესია თქვენი, როგორც სახელმწიფოს მეთაურის პირადი მაგალითის მნიშვნელობა.
იმედს გამოვთქვამთ, რომ ის დიდად შეუწყობს ხელს საზოგადოებრივი აზრისა და მოსახლეობის მობილიზებას საყოველთაო ვაქცინაციისთვის, რაც საბოლოო ჯამში პანდემიის დამარცხებისა და ქვეყნის წარმატებული განვითარების აუცილებელი წინაპირობაა“, - ნათქვამია თენგიზ ცერცვაძის განცხადებაში.