ჩვენ გვექნება სრულყოფილი, ხარისხიანი მეტეოროლოგიური ინფორმაცია, - ამის შესახებ გარემოს დაცვისა და სოფლის მეურნეობის მინისტრმა ლევან დავითაშვილმა პარლამენტის პლენარულ სხდომაზე განაცხადა, სადაც “მინისტრის საათის“ ფორმატში უსმენენ.

მინისტრის ინფორმაციით, 2020 წელს ქუთაისში თანამედროვე რადარი დამონტაჟდა.

“ეს არის ყველაზე თანამედროვე სისტემები, ყველაზე თანამედროვე მოწყობილობა იმისთვის, რომ ზუსტი მეტეოროლოგიური ინფორმაცია გვქონდეს, რომელიც მთლიანად დასავლეთ საქართველოს ფარავს. უკვე მიმდინარე წელს, დაგეგმილია ქალაქ თბილისთან, შიდა ქართლის ტერიტორიის, დიდწილად ქვემო ქართლისა და ასევე, სამცხის მეტეოროლოგიური მონაცემების დამუშავებისთვის, ასეთივე თანამედროვე რადარის განთავსება.

შეგახსენებთ, რომ ჩვენ კახეთში გვაქვს თანამედროვე მეტეოროლოგიური რადარი და ამ სამი რადარის ინფორმაცია, ფაქტობრივად, დაფარავს მთლიან საქართველოს. ჩვენ გვექნება სრულყოფილი, ხარისხიანი მეტეოროლოგიური ინფორმაცია, როგორც პრევენციული ღონისძიებებისთვის, ისე ინფრასტრუქტურისთვის, სოფლის მეურნეობისთვის და სხვა მიმართულებებით. ეს არის ძალიან მნიშვნელოვანი; ჩვენ გვექნება ამინდის პროგნოზის ძალიან ზუსტი სისტემა“, - განაცხადა გარემოს დაცვისა და სოფლის მეურნეობის მინისტრმა პარლამენტში, „“მინისტრის საათის“ ფორმატში გამოსვლის დრო.