დღეს, რელიგიის საკითხთა სახელმწიფო სააგენტოს თავმჯდომარე, ზაზა ვაშაყმაძე, თავმჯდომარის მოადგილე, გიორგი უკლება და სტრატეგიული კვლევის, ანალიზისა და რეგიონების სამსახურის თანამშრომელი, გიორგი პატაშური გორში, ევანგელურ-პროტესტანტულ ეკლესიაში იმყოფებოდნენ.
რელიგიის სააგენტოს ინფორმაციით, საქართველოს ევანგელურ-პროტესტანტული ეკლესიის უფროსმა პასტორმა, გიორგი ჩიტაძემ და პასტორმა, შმაგი ჭანკვეტაძემ სტუმრებს ინფორმაცია მიაწოდეს გორის ევანგელურ-პროტესტანტულ ეკლესიაში ჩატარებული სამშენებლო სამუშაოების შესახებ.
“მათვე მადლობა გადაუხადეს რელიგიის სააგენტოს მშენებლობის დაფინანსებისთვის. როგორც სამუშაო შეხვედრისას გაირკვა, გორის ევანგელურ-პროტესტანტულ ეკლესიას ესაჭიროება სამლოცველო დარბაზი, რომლის მშენებლობაში დახმარებაც ეკლესიის მესვეურებმა რელიგიის სააგენტოს სთხოვეს, რაშიც სააგენტოს თავმჯდომარემ, ზაზა ვაშაყმაძემ მათ თანადგომა აღუთქვა“,- აღნიშნულია ინფორმაციაში.