ჯანდაცვის მინისტრის, ეკატერინე ტიკარაძის განცხადებით, მსოფლიოში, „ასტრაზენეკას“ ვაქცინით აცრილი 7 მილიონი ადამიანიდან მხოლოდ 41 შემთხვევაში დაფიქსირდა უკუჩვენება.

ტიკარაძის თქმითვე, არცერთი მათგანი ლეტალურად არ დამთავრებულა.

„აღსანიშნავია, რომ ეს არ არის გართულება, რომელიც შეიძლება ახლდეს მხოლოდ ვაქცინაციას, ან კონკრეტულად „ასტრაზენეკას“, ეს არის ერთ-ერთი ისეთი გართულება, რომელსაც ხშირად აქვს ადგილი სამედიცინო სფეროში. ჩვენ შევისწავლეთ ის სტატისტიკა, რომელიც საქართველოსთვის არის დამახასიათებელი და წლის მანძილზე, ჩვენ გვაქვს 60-დან 80-მდე მსგავსი შემთხვევა, რომელიც უბრალოდ არ ხდება საზოგადოებისთვის და მედიისთვის ცნობილი.

ჩვენ ასევე, გვაქვს სტატისტიკური მონაცემები „ასტრაზენეკასთან“ მიმართებაში, როცა 7 მილიონ ვაქცინირებულ ადამიანზე მხოლოდ 41 შემთხვევის დაფიქსირება მოხდა და ამ 41 შემთხვევიდან არცერთი არ ყოფილა ლეტალური, აქედან გამომდინარე, ეს არ იძლევა იმის საფუძველს, რომ პროცესი შეჩერდეს და მას გარკვეული რისკები შეექმნას“, - განაცხადა ტიკარაძემ.

შეგახსენებთ, რომ ახალციხის კლინიკაში 27 წლის მედდას „ასტრაზენეკას“ ვაქცინის გაკეთების შემდეგ სავარაუდოდ, ანაფილაქსიური რეაქცია დღეს დაუფიქსირდა. ის ცოტა ხნის წინ პირველ საუნივერსიტეტო კლინიკაში კატასტროფის ბრიგადამ შეიყვანა.