სერგო ჩიხლაძის განცხადებით, ანაფილაქსიური შოკი ნებისმიერმა მედიკამენტმა ან ვაქცინამ შეიძლება გამოიწვიოს და ამის გამო ვაქცინაზე უარი არ უნდა ითქვას

„სტრატეგია აღმაშენებლის“ წევრის სერგო ჩიხლაძის განცხადებით, ანაფილაქსიური შოკი ნებისმიერმა მედიკამენტმა ან ვაქცინამ შეიძლება გამოიწვიოს და ამის გამო ვაქცინაზე უარი არ უნდა ითქვას.

ამასთან, ხელისუფლების გადაწყვეტილებას, რომ ვაქცინაციის პროცესი არ შეჩერდა, ჩიხლაძე სწორს უწოდებს.

„ვაქცინას შეიძლება იშვიათად ჰქონდეს გართულება, ისევე როგორც ანტიბიოტიკებს, ტკივილგამაყუჩებელს, როგორც ნებისმიერ სამკურნალო საშუალებას. მაგრამ იმის გამო, რომ ვიღაცას, მაგალითად, ანტიბიოტიკებზე, ანაფილაქსია განუვითარდა, არ ნიშნავს იმას, რომ ანტიბიოტიკებს ვიღებთ მოხმარებიდან, ან თუ ვინმეს ლიდოკაინზე განუვითარდა ანაფილაქსია, ამის გამო სტომატოლოგთან სიარულს არ ვწყვეტთ. იმის გამო, რომ 100 ათას შემთხვევაში 1 ან 2 გართულება შეიძლება იყოს ვაქცინაზე, არა მხოლოდ კოვიდსაწინააღმდეგოზე, არამედ სხვა ნებისმიერ აპრობირებულ და დიდი ხნის განმავლობაში გამოყენებად ვაქცინაზე, ვაქცინებზე უარას არ ვამბობთ. ამისთვის კამპანია და ინფორმირება აუცილებელია და უნდა გაგრძელდეს. ჯერჯერობით, რაც ჩანს, გადაცდომას ადგილი არ უნდა ჰქონდეს“,- განაცხადა ჩიხლაძემ.

რაც შეეხება ასეთი შემთხვევებისგან პრევენციის ზომებს, ჩიხლაძე ამბობს, რომ ანაფილაქსიური შოკისგან თავის დაზღვევის მიზნით ანამნეზის დეტალურად გამოკვლევა უნდა მოხდეს.

„ასეთი შემთხვევებისგან თავის დაზღვევის მექანიზმი არის კარგად გამოკითხული ანამნეზი, რომ პაციენტს როდესმე რაიმე ისეთი რეაქცია ან უკუჩვენება ხომ არ ჰქონდა, რომ ამის გამო სამედიცინო პერსონალმა ეჭვი მიიტანოს. როგორც წესი, კარგად შეგროვებული ანამნეზის 80-85% შემთხვევაში ვლინდება, რომ იქ რაღაც ალერგიული ფონი შეიძლება იყოს, ამიტომ დიდი მნიშვნელობა აქვს ამ პროცესს“,- განაცხადა ჩიხლაძემ.

შეგახსენებთ, რომ ახალციხის კლინიკაში 27 წლის მედდას „ასტრაზენეკას“ ვაქცინის გაკეთების შემდეგ, სავარაუდოდ, გვერდითი რეაქცია ანაფილაქსიური შოკი გუშინ განუვითარდა. პაციენტი თბილისში პირველ საუნივერსიტეტო კლინიკაში გუშინვე გადმოიყვანეს, თუმცა დღეს ის გარდაიცვალა.

ვახტანგ ძაბირაძე - თუ ხელისუფლება და ოპოზიცია მეორე ტურის უკეთ გასაკონტროლებლად კონკრეტულ მექანიზმებზე ვერ შეთანხმდნენ, მაშინ გამოვა, რომ ორივე მხარე შეგნებულად მიდის ვითარების გამწვავებაზე
ქართული პრესის მიმოხილვა 14.10.2021
ვიტალი ბალა - თუ სააკაშვილის კიევში დაბრუნებასთან დაკავშირებით უკრაინისა და საქართველოს პირველ პირებს შორის შეთანხმება იქნა მიღწეული, ამ თემაზე საქართველოს ხელისუფლების ადრე გაკეთებული განცხადებები ბევრს არც არაფერს ნიშნავს
ქართულ ბაზარზე ახალი ინოვაციური ბრენდი „მულტი“ შემოდის
BTU აბიტურიენტებისთვის და მაგისტრანტობის კანდიდატებისთვის მასშტაბურ პროექტს იწყებს