ფეხბურთელ გიორგი შაქარაშვილის საქმეზე ძალადობის ეპიზოდზე დაკავებულების მიმართ გამამტყუნებელი განაჩენის გამოტანას მათი ოჯახის წევრების უკმაყოფილება მოჰყვა. თბილისის საქალაქო სასამართლოს ეზოში ხმაური იყო, სადაც მსჯავრდებულების ოჯახის წევრები აცხადებდნენ, რომ მოსამართლემ უკანონო გადაწყვეტილება გამოიტანა.
ერთ-ერთი ბრალდებულის, თენგიზ ბარბაქაძის მამის განცხადებით, გარკვეულმა პირებმა გამოძიებასთან ითანამშრომლეს, რის საფუძველზეც, დაკავებულებს გამამტყუნებელი განაჩენი მიუსაჯეს.
„გავასაჩივრებთ, გადაწყვეტილება მოულოდნელი იყო. ვთქვათ, პატარა წაიჩხუბეს, ვინმე მომჩივანი არის? 19-20 წლის ბიჭებს ციხეში უშვებენ, ვიღაცეებმა ითანამშრომლეს, რომ ეს ბიჭები ციხეში ჩაყარონ. რა მოიგეს ამით? წინასწარ ვიცოდი გუშინ, რომ 5 წელი ჰქონდათ გადაწყვეტილი. მოსამართლე არც გასულა სათათბიროდ, პირდაპირ მიუსაჯა",- განაცხადა ბარბაქაძემ.
ფეხბურთელ გიორგი შაქარაშვილის საქმის ძალადობის ეპიზოდზე ბრალდებული 5 სრულწლოვანი თბილისის საქალაქო სასამართლომ დამნაშავედ ცნო.
დაკავებული 5 პირიდან 4 ბრალდებულს 5-5 წლიანი პატიმრობა, ერთ პირს - მორაგბე ვასილ მახარაძეს კი 9-წლიანი პატიმრობა მიესაჯა.