არც „ქართული ოცნება", არც ბიძინა ივანიშვილი და არავინ თავისი ნებით ძალაუფლებას ლანგარზე დადებულს არ დათმობს, იქნება სერიოზული სანქციები დასავლეთიდან და ასევე, უნდა იყოს სერიოზული პროტესტი ჩვენი საზოგადოებისგან, - ამის შესახებ „სტრატეგია აღმაშენებლის" წევრმა პაატა მანჯგალაძემ „ნაციონალური მოძრაობის" ოფისში, ოპოზიციური პარტიების წარმომადგენლების შეხვედრის დაწყებამდე განაცხადა.

მისივე თქმით, ოპოზიცია ყველაფერს გააკეთებს იმისთვის, რომ წნეხი „ქართულ ოცნებაზე" როგორც ქვეყნის შიგნით, ასევე ქვეყნის გარეთ გაიზარდოს.

„დღევანდელი შეხვედრა ეძღვნება ახალ რეალობას. „ქართული ოცნების" ბოლო ქმედებებმა ყველას დაანახა როგორც ქვეყნის შიგნით, ასევე ქვეყნის გარეთ ის, რომ „ქართული ოცნება" არ არის განწყობილი დიალოგისთვის. უფრო მეტიც, ამ ბოლო ქმედებებით „ქართული ოცნება" სერიოზულ დაბრკოლებად და ხელშემშლელ ფაქტორად იქცა ჩვენი ევროინტეგრაციისთვის და საქართველოს მოქალაქეებისთვის. ძალიან ძნელია „ქართული ოცნების" ლოგიკის ახსნა, მაგრამ მარტივია თუ ერთ მექანიზმს ჩავრთავთ - სავარაუდო ქმედებიდან ყველაზე ცუდი სცენარი რომელიც იქნება და ყველაზე ანტისახელმწიფოებრივი სწორედ ამას გააკეთებს „ქართული ოცნება". არც „ქართული ოცნება", არც ბიძინა ივანიშვილი და არავინ თავისი ნებით ძალაუფლებას ლანგარზე დადებულს არ დათმობს. უნდა იყოს და იქნება კიდეც სერიოზული სანქციები დასავლეთიდან და ასევე, უნდა იყოს სერიოზული პროტესტი ჩვენი საზოგადოებისგან - ჩვენ გავაკეთებთ ყველაფერს, რომ წნეხი გაიზარდოს როგორც ქვეყნის შიგნით, ასევე ქვეყნის გარეთ", - განაცხადა მანჯაგალაძემ.