ირაკლი კობახიძეს ვეთანხმები - ნამდვილად ხელოვნურია ეს კრიზისი, ოღონდ ეს თავიდან ბოლომდე „ქართულმა ოცნებამ“ შექმნა და არა ოპოზიციამ, - ამის შესახებ ჟურნალისტებს „ევროპული საქართველოს“ ერთ-ერთმა ლიდერმა სერგი კაპანაძემ განუცხადა.

მისივე თქმით, თუკი ვინმეს ამ კრიზისზე პასუხისმგებლობა ეკისრება, ეს არის ცალსახად „ქართული ოცნება“.

„ეს კრიზისი „ქართულმა ოცნებამ“ შექმნა თავის დროზე, როცა არჩევნები გააყალბა, მერე შექმნა, როცა „ნაციოანლური მოძრაობის“ ოფისში შეიჭრა და ნიკა მელია დააკავა და კიდევ უფრო გააღრმავა მას შემდეგ, რაც ჩაშალა მოლაპარაკებები. თუ კი ვინმეს პასუხისმგებლობა ეკისრება, ეს არის ცალსახად „ქართული ოცნება“. პარლამენტში შესვლა არის შესაძლებელი, ოღონდ შეთანხმების შემდეგ და შეთანხმება უნდა მოიცავდეს არჩევნებზე შეთანხმებას, პოლიტიკური დევნის დასრულებაზე შეთანხმებას და ახალ საარჩევნო სისტემაზე შეთანხმებას, რადგან ამაზე უარი განაცხადა „ქართულმა ოცნებამ“, ამიტომ ახლა საუბარი პარლამენტში შესვლაზე არარელევანტურია. თუ „ქართულ ოცნებას“ მართლა სურს, რომ კრიზისი განმუხტოს, რასაც ხელოვნურ კრიზისს ეძახის, მაშინ კეთილი ინებოს, დაუბრუნდეს მოლაპარაკების მაგიდას, მიიღოს ის შემოთავაზებები, რომელზეც იყო საუბარი, მაშინ კრიზისი მართლა განიმუხტება და ოპოზიციაც მანამ, სანამ ახალი არჩევნები ჩატარდება, იქნება პარლამენტში“, - განაცხადა კაპანაძემ.