როგორც მე განვიცდი ამ შემთხვევას, არ მგონია, ვინმე სხვა განიცდიდეს. ექიმები სხვანაირად განვიცდით ამას, - ამის შესახებ დაავადებათა კონტროლის ეროვნული ცენტრის დირექტორმა ამირან გამყრელიძემ ახალციხეში ვაქცინაციის შემდეგ ექთნის გარდაცვალებასთან დაკავშირებით განაცხადა.

ამასთან, როგორც ის აღნიშნავს, პანდემიის დამარცხება ვაქცინაციზე გადის.

„ვაქცინაცია უნდა იყოს დღეს ზესახელმწიფოებრივი საკითხი იმიტომ, რომ ვაქცინაციაზე გადის მსოფლიოში პანდემიის და ქვეყანაში ეპიდემიის დამარცხება. ვაქცინაციის გარეშე ვერ დავუბრუნდებით ნორმალური ცხოვრების რიტმს, დიდხანს დაგვჭირდება პირბადის ტარება და სხვა შეზღუდვები“,- განაცხადა გამყრელიძემ.

კითხვაზე, რა ნაბიჯებს გადადგამს ჯანდაცვის უწყება იმ შემთხვევაში, თუ ვაქცინაციაზე ასაკობრივი ჯგუფების აქტივობა დაბალი დარჩება, გამყრელიძე ამბობს, რომ ამ შემთხვევაში ვაქცინაციის საკოორდინაციო საბჭო მიზნობრივი ჯგუფების გაფართოებაზე იმსჯელებს. მისივე თქმით, „ვაქცინაცია სავალდებულო არ გახდება და ყოველთვის ნებაყოფლობითად დარჩება“.

იხილეთ ვიდეო:ამირან გამყრელიძე არ გამორიცხავს, რომ 27 წლის ექთნის საკითხის შესასწავლად საქართველოში "ასტრაზენეკას" წარმომადგენლები ჩამოვიდნენ