ჩვენ განვიხილეთ საქართველოს საკითხი ევროკავშირის ინტენსიური მედიაციის ძალისხმევის შემდეგ, რომელიც მიმართულია ქვეყანაში პოლიტიკური კრიზისის დაძლევისკენ, - ამის შესახებ საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, ჟოზეფ ბორელმა ევროკავშირის საგარეო საქმეთა მინისტრების საბჭოს სხდომის შემდეგ გამართულ ბრიფინგზე განაცხადა.
მისი თქმით, შარლ მიშელის პირადი წარმომადგენლის საშუალებით ევროკავშირის მედიაციის ძალისხმევა კვლავ გრძელდება.
„მინისტრებს მივაწოდე ინფორმაცია ევროკავშირ-საქართველოს ასოცირების საბჭოს შეხვედრის შესახებ, რომელიც გასული კვირის სამშაბათს ჩატარდა და ასევე ევროსაბჭოს პრეზიდენტის, შარლ მიშელის პირადი წარმომადგენლის საშუალებით ევროკავშირის მედიაციის ძალისხმევის შესახებ. ეს მუშაობა გრძელდება და მსურს კიდევ ერთხელ გავიმეორო, რომ ქართული პოლიტიკური პარტიების ყველა ლიდერმა ქართველი ხალხის ინტერესები პირველ ადგილზე უნდა დააყენოს, წავიდეს საჭირო კომპრომისებზე და ყურადღება ისეთ საკითხებზე გადაიტანოს, როგორიცაა პანდემია, ეკონომიკური აღდგენა და ეროვნული უსაფრთხოება“, - განაცხადა ჟოზეფ ბორელმა.