საკუთრივ დანიელსონი, რა თქმა უნდა, მნიშვნელოვანი ფიგურაა, თუმცა, ბევრად უფრო მნიშვნელოვანია ევროკავშირის დამოკიდებულება საქართველოში მიმდინარე მოვლენებზე,- ამის შესახებ საპარლამენტო უმრავლესობის წევრმა, დავით სერგეენკომ ჟურნალისტებთან განაცხადა, რითაც საქართველოში კრისტიან დანიელსონის დაანონსებულ ვიზიტს და მოლაპარაკებების განახლებას გამოეხმაურა.

სერგეენკოს თქმით, მნიშვნელოვანია, რომ ევროკავშირი საქართველოს მხარს უჭერს.

„თუ ტექნიკურად ისე მოხდა, რომ იგივე ადამიანი, დანიელსონი ჩამოვიდა, გამიჭირდება გითხრათ, რა ფორმატი იქნება. ნებისმიერი მოლაპარაკება მოიცავს კომპრომისს. ამ მოლაპარაკების განმავლობაში 10 პუნქტიდან 9 პუნქტი იყო მოთხოვნა მმართველი ძალის მიმართ, რომ რაღაც გაეკეთებინა და ოპოზიციის წარმომადგენლებმა ხაზგასმულად გააჟღერეს მთლიანად ოპოზიციის სურვილი, როცა თქვეს, რომ მათი ერთადერთი კომპრომისი არის ის, რომ სხედან მოლაპარაკების მაგიდასთან,"- განაცხადა სერგეენკომ.