წითელი ჯვრის საზოგადოებასა და საქართველოს ფოსტას შორის მემორანდუმი გაფორმდა
საქართველოს წითელი ჯვრის საზოგადოებას და საქართველოს ფოსტას შორის ურთიერთთანამშრომლობის მემორანდუმი გაფორმდა.
მემორანდუმს ხელი მოაწერეს საქართველოს წითელი ჯვრის პრეზიდენტმა, ნათია ლოლაძემ და საქართველოს ფოსტის გენერალურმა დირექტორმა ლევან ჩიკვაიძემ.
მემორანდუმის მიზანია, ურთიერთთანამშრომლობის გაღრმავება საქართველოს წითელ ჯვარსა და საქართველოს ფოსტას შორის და ერთობლივი საქმიანობების განხორციელება სოციალური და საქველმოქმედო მიმართულებით.
„აღნიშნული მემორანდუმის ფარგლებში დაგეგმილი პირველი კამპანია არის #შენიმარკა, რომელიც შეიქმნა საქართველოს წითელი ჯვრის საზოგადოების ინიციატივით, საქართველოს ეკონომიკისა და მდგრადი განვითარების სამინისტროსთან მჭიდრო თანამშრომლობით. მარკაზე გამოსახულია საქართველოს ეროვნული გმირი და საქართველოს წითელი ჯვრის მოწყალების და მარო მაყაშვილი, რომელიც დამოუკიდებელი საქართველოს სიმბოლოდ იქცა.
მარკის ღირებულებიდან ყოველი ერთი ლარი ჩაირიცხება წითელი ჯვრის შემოწირულობის ფონდში.
საქართველოს წითელი ჯვრის საზოგადოება მადლობას უხდის საქართველოს ეკონომიკისა და მდგრადი განვითარების სამინისტროს და საქართველოს ფოსტას“,- აღნიშნულია გავრცელებულ ინფორმაციაში.
