„სამართლიანი არჩევნების“ აღმასრულებელი დირექტორი - ვენეციის კომისიის შეფასება  ძალიან მნიშვნელოვანია და ხელისუფლებას მოუწევს მათი რეკომენდაციების გათვალისწინება

„სამართლიანი არჩევნების“ აღმასრულებელი დირექტორის, ნინო დოლიძის განცხადებით, ვენეციის კომისიის შეფასება ძალიან მნიშვნელოვანია და ხელისუფლებას მოუწევს მათი რეკომენდაციების გათვალისწინება.

როგორც ნინო დოლიძემ აღნიშნა, თუ ვენეციის კომისიის დასკვნა გათვალისწინებული არ იქნება, ქვეყანაში არსებული კრიზისი კიდევ უფრო გაღრმავდება.

„ვენეციის კომისიის დასკვნის მიხედვით, პოლიტიკური პარტიების სანქცირება არის არაპროპორციული ძალის გამოყენება პოლიტიკურ პარტიებთან მიმართებაში, რადგან ეს შეზღუდავს პოლიტიკური პარტიების თანასწორუფლებიანობას საარჩევნო პროცესებში. ასევე, დასკვნაში საუბარია არამხოლოდ პარტიების, არამედ ინდივიდუალური დეპუტატების ხელფასის დაქვეითებაზეც, რომელიც როგორც პარლამენტის რეგლამენტთან, ასევე შესაძლოა, წინააღმდეგობაში მოდიოდეს საქართველოს კონსტიტუციასთანაც. ორივე შემთხვევაში, ვენეციის კომისიამ მიიჩნია, რომ უნდა გადაიხედოს ეს პუნქტები, ამიტომ ვიმედოვნებთ, რომ ხელისუფლებას მოუწევს ვენეციის კომისიის რეკომენდაციების გათვალისწინება.

თუ არ გადაიხედება, ეს იქნება გადადგმული ნაბიჯი ინკლუზიურობის და თანასწორობის წინააღმდეგ და კიდევ უფრო გააღრმავებს იმ კრიზისს, რომელიც ქვეყანაშია. ამიტომ, ძალიან მნიშვნელოვანია, რომ ხელოსუფლებამ გაითვალისწინოს ეს რეკომენდაციები და ხელი შეუწყოს როგორც პარტიების თანასწორობას, ზოგადად დიალოგისკენ უფრო პოზიტიური ნაბიჯები გადადგას”,- განაცხადა დოლიძემ.

ცნობისთვის, ვენეციის კომისიისა და ეუთო/ოდირის დასკვნაში აღნიშნულია, რომ პოლიტიკური პარტიების და არა ცალკეული დეპუტატების სანქცირება დაფინანსების 6 თვით შეწყვეტის სახით იმ შემთხვევაში, თუ ისინი საპარლამენტო სხდომებისა და სესიების დიდ ნაწილს არ დაესწრებიან, არაპროპორციულად აღიქმება და წინააღმდეგობაში მოდის პარლამენტის რეგლამენტთან. როგორც კომისიის დასკვნაშია აღნიშნული, არაპროპორციულად აღიქმება საპარლამენტო რეგლამენტის შესწორების საკითხიც, რომელიც იმავე შემთხვევაში დეპუტატის ანაზღაურების დაქვითვას ითვალისწინებს.

ამასთან, ვენეციის კომისია ლიდერის უცხო ქვეყნის მოქალაქეობის გამო, პარტიის რეგისტრაციიდან მოხსნას „არაპროპორციულ ზომად“ მიიჩნევს და „ქართულ ოცნებას“ მიმართავს, კანონპროექტის მიღების საკითხს გადახედოს.

ესტონეთის ელჩი - რუსეთს არ სჭირდება წინაპირობა რომ ვინმეს დაესხას თავს, ის გახდა უფრო არაპროგნოზირებადი ვიდრე ოდესმე
გაგიკ ავაკიანი - რუსეთი იმ მდგომარეობაში არაა, რომ სომხეთის საშინაო პოლიტიკაში მისი ჩარევები  წარმატებული იყოს და მას რამე გამოუვიდეს
ქართული პრესის მიმოხილვა 19.05.2022
ზვიად გუბელაძე - გაჟღერებული ბრალდებები, თითქოსდა ნიკა გვარამიას ტელევიზიის  ბალანსზე არსებული ავტომობილით სარგებლობის გამო მიესაჯა თავისუფლების აღკვეთა, არ შეესაბამება სიმართლეს და მიზნად ისახავს საზოგადოების შეცდომაში შეყვანას
ნიკოლოზ ვაშაკიძე - არსებული ხელისუფლება წამოადგენს მთავარ დაბრკოლებას ქვეყანა პოლიტიკურად განახლებული და მომზადებული შეხვდეს კარდინალურ ცვლილებებს რეგიონში და მსოფლიოში
ლიბერთი პროექტის „ახალგაზრდული მეწარმეობა სოფლის განვითარებისთვის“ სტრატეგიული პარტნიორი  გახდა
„გალერეა დემასში“ პრემიუმ ხარისხის ევროპული სლებების ასორტიმენტი განახლდა
Urban Hotel-ი მარტის დასაწყისიდან უკრაინელ დევნილებს მასპინძლობს
სიმსუქნის ქირურგიული მკურნალობა - ბარიატრიული ოპერაციები ბოჭორიშვილის კლინიკაში