საქართველოს ეკონომიკისა და მდგრადი განვითარების მინისტრი ნათია თურნავა და ინოვაციების და ტექნოლოგიების სააგენტოს თავმჯდომარე ავთანდილ კასრაძე ტექნოპარკში ტექნოლოგიების გადაცემის საპილოტე პროგრამაში (TTPP) შერჩეული პროექტების ავტორ-მეცნიერებს შეხვდნენ. შეხვედრას ასევე, ესწრებოდა ეკონომიკისა და მდგრადი განვითარების მინისტრის მოადგილე ირაკლი ნადარეიშვილი.
ეკონომიკისა და მდგრადი განვითარების სამინისტროს ცნობით, შეხვედრა დისკუსიის რეჟიმში წარიმართა და მონაწილეებმა მინისტრს თავიანთი პროექტები გააცნეს.
ტექნოლოგიების გადაცემის საპილოტე პროგრამა (TTPP) 2019 წლის აპრილში დაიწყო და მისი მიზანია, ხელი შეუწყოს ისეთი სამეცნიერო პროექტების კომერციალიზაციას, რომელიც პასუხობს ბაზრის საჭიროებებს.
უწყების განცხადებაში ნათქვამია, რომ პროექტს საქართველოს ინოვაციების და ტექნოლოგიების სააგენტო მსოფლიო ბანკის ტექნიკური მხარდაჭერითა და ევროკავშირის დაფინანსებით ახორციელებს. პროგრამის ხანგრძლივობა კი სამი წელია.
სამინისტროს ინფორმაციით, პროექტის ფარგლებში კომერციალიზაციის პოტენციალის მქონე იდეები შეირჩა. კერძოდ, პროექტები, რომლებიც არის ტექნოლოგიების მზაობის TRL4 და შემდეგ დონეზე. შერჩეულ ცალკეულ პროექტებს, სპეციალურად მათთვის შემუშავებული კომერციალიზაციის გეგმებიდან გამომდინარე, აქვთ წვდომა ფინანსურ და ტექნიკურ რესურსებზე, მათ ინდუსტრიულ პარტნიორებთან წარსადგენად, როგორც საქართველოში, ისე მის ფარგლებს გარეთ.
„ტექნოლოგიების გადაცემის საპილოტე პროგრამის ფარგლებში 74 საპროექტო განაცხადიდან მეორე ეტაპზე, რაც გულისხმობდა ტექნოლოგიების შესწავლას ბიზნესის, ტექნოლოგიის და ინტელექტუალური საკუთრების ჭრილში, 13 პროექტი გადავიდა. აღნიშნულიდან კომერციალიზაციის მაღალი პოტენციალის მქონე 9 ტექნოლოგია შეირჩა. მათი განვითარებისთვის კომერციალიზაციის ცალკეული გეგმები შემუშავდა. თითოეულ პროექტზე, სხვადასხვა პოტენციურ ინდუსტრიულ პარტნიორთან მოლაპარაკებები მიმდინარეობს, ტექნოლოგიის ლიცენზირების ან სხვა გზით კომერციალიზაციის კუთხით. პოტენციურ ინდუსტრიულ პარტნიორებს შორის განიხილებიან ისეთი მსხვილი კომპანიები, როგორებიცაა: AIRBUS-ი, Airbus Helicopters-ი, Naval Group-ი CAOSA, MMC-ი და სხვა”,- აღნიშნულია ინფორმაციაში.