მაჭავარიანის ქუჩაზე და მიმდებარე ფერდებზე მეწყრული პროცესის მიმდინარეობასთან დაკავშირებით სამუშაო ჯგუფის მორიგი შეხვედრა გაიმართა,- ამის შესახებ ინფორმაციას დედაქალაქის მერია ავრცელებს.

უწყების ცნობით, შეხვედრაზე სამუშაო ჯგუფის წევრებმა არსებულ ვითარებასთან დაკავშირებით იმსჯელეს და ახლო მომავალში განსახორციელებელ ღონისძიებებთან დაკავშირებით საკუთარი მოსაზრებები გამოთქვეს.

„სამუშაო ჯგუფის კიდევ ერთი შეხვედრა შედგა. მივიღეთ გადაწყვეტილება, რომ ხვალ ადგილზე გავა სამუშაო ჯგუფი მეწყრულ ზონას გერმანელ სპეციალისტებთან ერთად დაათვალიერებს. ყველა სიახლეს ამ საკითხთან დაკავშირებით საზოგადოებას ეტაპობრივად ვაცნობებთ“, - განაცხადა თბილისის მერიის ინფრასტრუქტურის განვითარების საქალაქო სამსახურის უფროსმა გიორგი აბუთიძემ.

როგორც მერიაში აცხადებენ, სამუშაო ჯგუფი მეწყრული პროცესის დაწყებისთანავე შეიქმნა და მის შემადგენლობაში მერიის შესაბამისი სამსახურები, გარემოს ეროვნული სააგენტოს, საგანგებო სიტუაციების მართვის სამსახურის, სამხარაულის ექსპერტიზის ეროვნული ბიუროს წარმომადგენლები, ასევე, დარგის ქართველი და უცხოელი სპეციალისტები შედიან.

იხილეთ ვიდეო:მაჭავარიანის ქუჩაზე მეწყრული პროცესის მიმდინარეობასთან დაკავშირებით სამუშაო ჯგუფის მორიგი შეხვედრა გაიმართა