სინამდვილეში არავისთვის ყურები არ აუწევიათ - იყო კეთილგანწყობილი, მეგობრული მაგრამ ძალიან კრიტიკული და ობიექტური განხილვა, - ამის შესახებ „მოქალაქეების“ ლიდერმა ალეკო ელისაშვილმა ტელეკომპანია „პალიტრანიუსის“ გადაცემა „360 გრადუსში“ სენატში საქართველოს შესახებ მოსმენასთან დაკავშირებით განაცხადა.

ელისაშვილი სენატორების განცხადებებს საქართველოსთვის სამარცხვინოს უწოდებს. ამასთან, როგორც ის აღნიშნავს, განხილვაზე გულწრფელი კითხვები დაისვა, მათ შორის იმასთან დაკავშირებით, ასრულებს თუ არა ივანიშვილი და „ქართული ოცნება“ რუსეთის დავალებებს.

„გულახდილი კითხვები იყო, მათ შორის სახელმწიფო დეპარტამენტის წარმომადგენელს ჰკითხეს, ემსახურება თუ არა ივანიშვილი რუსებს და ასრულებს, თუ არა ის ან „ქართული ოცნება“ რუსეთის დავალებებს. ნაჯახივით კითხვები იყო. ფაქტია, მხარს უჭერენ საქართველოს, მაგრამ გვაძლევენ შენიშვნებს, გვეუბნებიან, მართლმსაჯულებას, საარჩევნო სისტემას, ქვეყანას მიხედეთ. ყველაზე სამარცხვინო კი, რაც გვესმის ის არის, რომ თქვენი პარტიული ინტერესის იქით დაინახეთ ხალხის ინტერესები. კიდევ რაც სამარცხვინო გვითხრეს ესაა - ხალხზე და რეალურ პრობლემებზე იფიქრეთ, კორონავირუსს და ეკონომიკას როგორ ებრძოლოთ, უმუშევრობას რა უნდა მოუხერხოთ. ამას რომ გეტყვიან, არ უნდა შეგრცხვეს ქართველი პოლიტიკოსი რომ ხარ?“,- განაცხადა ელისაშვილმა.