კელი დეგნანი გამბედაობისკენ მოუწოდებს პოლიტიკურ ძალებს, რომლებმაც ვერ გაბედეს და თავი ვერ დააღწიეს იმ ბულინგს, რაც მოდის „ნაციონალური მოძრაობიდან“,- ამის შესახებ საპარლამენტო უმრავლესობის წევრმა გურამ მაჭარაშვილმა ჟურნალისტებთან განაცხადა.
მისი თქმით, შეთანხმება აუცილებელია, თუმცა, იმ ფაქტის გათვალისწინებით, რომ ოქტომბრის საპარლამენტო არჩევნები ლეგიტიმურად არის აღიარებული.
„კელი დეგნანის განცხადება კიდევ ერთხელ ადასტურებს იმას, რომ „ქართულ ოცნებას" მოლაპარაკებებში ჰქონდა ისეთი წინადადება შეთავაზებული, სადაც იყო რესურსი შეთანხმების. სწორედ ამიტომ მოუწოდებს გამბედაობისკენ პოლიტიკურ ძალებს, რომლებმაც ვერ გაბედეს და თავი ვერ დააღწიეს იმ ბულინგს, რაც მოდის „ნაციონალური მოძრაობიდან“. ბოლო 5 თვის მანძილზე განსაკუთრებით დაამტკიცა ევროპის ყველა ინსტიტუციამ და ბოლოს უკვე აშშ-ის სენატმა, რომ ეს იყო წარმატებული 8 - წლიანი პროცესი, რომელსაც „ქართული ოცნების“ ხელისუფლების პირობებში მიაღწია საქართველომ და ამ პროცესის გაგრძელებისთვის ბუნებრივია, მნიშვნელოვანია შეთანხმების მიღწევა, მაგრამ იმ ფონზე, როცა აღიარებულია ოქტომბრის საპარლამენტო არჩევნები ლეგიტიმურად და აუცილებლად მიაჩნიათ, რომ ოპოზიციის წარმომადგენლები შემოვიდნენ პარლამენტში“, - განაცხადა მაჭარაშვილმა.
ცნობისთვის, აშშ - ის ელჩმა საქართველოში კელი დეგნანმა „საზოგადოებრივ მაუწყებელთან“ განაცხადა, რომ მხარეებს აქვთ სურვილი ისხდნენ მოლაპარაკებათა მაგიდასთან, თუმცა, ის, რისი ნაკლებობაც არის, ესაა პოლიტიკური გამბედაობა, რომ საბოლოო ნაბიჯი გადადგან წინ და წავიდნენ კომპრომისზე.