თუკი ის პატიოსანი კაცი საქართველოდან მეორედ ისე წავა, რომ შეთანხმება კვლავ ვერ შედგება, ამით ვინ დაზარალდება, დანიელსონი თუ საქართველო?! – უკვე ნახევარი წელია, რაც როგორც ერთი, ისე მეორე მხარე მაგიდას აჯანჯღარებს, - ამის შესახებ პარტია „მოქალაქეების“ ერთ-ერთმა ლიდერმა, დეპუტატმა ალეკო ელისაშვილმა ჟურნალისტებს განუცხადა.

მისივე თქმით, ერთი მხარე თავის წითელ ხაზებზე ლაპარაკობს, მეორე - თავის წითელ ხაზებზე და ამ დროს ხალხს სულ სხვა პრობლემა ადარდებს.

„არ არის ქართველი პოლიტიკოსების სირცხვილი, როცა ვაშინგტონში თუ ბრიუსელში გვეუბნებიან: - პირად პარტიულ ინტერესზე მაღლა დადექით, რეალობას თვალი გაუსწორეთ და ქვეყნისა და ხალხის რეალურ პრობლემებზე იფიქრეთ. მოლაპარაკება ხელის გადაწევა არ არის - მოლაპარაკების მაგიდაზე ქვეყნის მომავლი დევს. თუკი ჩვენთვის ქვეყნის მომავალი სულერთია, მაშინ კიდევ უფრო მეტ წითელ ხაზზე ვისაუბროთ და კედლები ამოვაშენოთ“, - განაცხადა ალეკო ელისაშვილმა.