ნათია მეზვრიშვილის განცხადებით, მას ძალიან ცუდი რეაქცია ექნებოდა, შს მინისტრის მოადგილის პოზიციაზე ყოფნისას აღმოეჩინა, რომ სამინისტრო უსმენს
მთავრობის ადმინისტრაციის ყოფილი ხელმძღვანელის ნათია მეზვრიშვილის განცხადებით, მას ძალიან ცუდი რეაქცია ექნებოდა, შინაგან საქმეთა მინისტრის მოადგილის პოზიციაზე რომ ყოფილიყო და აღმოეჩინა, რომ სამინისტრო უსმენს. ამის შესახებ მან „ტვ პირველთან“ ჟურნალისტის შესაბამისი კითხვის საპასუხოდ განაცხადა, რა რეაქცია ექნებოდა, მსგავსი ფაქტის აღმოჩენის შემთხვევაში. მეზვრიშვილის თქმით, შეუძლებელია, რომ ამ ფაქტს ვინმე მიესალმოს.
„ძალიან ცუდი რეაქცია მექნებოდა, შეუძლებელია ამას მივესალმოთ, ორჯერ ორი ოთხია,“- განაცხადა მეზვრიშვილმა.
ამასთანავე, კითხვაზე, რით შეიძლებოდა განპირობებულიყო ის ფაქტი, რომ შინაგან საქმეთა მინისტრის მოადგილეს კახა საბანაძეს უსმენდნენ, ნათია მეზვრიშვილმა განაცხადა, რომ თემას კარგად არ იცნობს.
„ვერ გეტყვით, არ ვიცი მე ამ თემის დეტალები. მიმდინარეობს შესაბამისი სამართლებრივი პროცედურები, როგორც საზოგადოებამ იცის და იმედია, ამ ყველაფერს რაღაც ლოგიკური დასასრული ექნება,“- განაცხადა მეზვრიშვილმა.
