გუშინდელი წარუმატებელი დღის ერთადერთი კარგი მომენტი იყო ის, რაც ბატონმა კობახიძემ საჯაროდ თქვა - მოლაპარაკების გარეშეც მართლმსაჯულების რეფორმაზე პარლამენტში ვიმსჯელებთო,- ამის შესახებ „მოქალაქეების“ ერთ-ერთმა ლიდერმა ალეკო ელისაშვილმა ჟურნალისტებთან განაცხადა.
მისი თქმით, სასამართლოს რეალური რეფორმა სჭირდება და არა ის ზედაპირული ცვლილებები, რასაც ახლა მმართველი გუნდი საერთო სასამართლოების შესახებ კანონში ახორციელებს.
„რეალური მართლმსაჯულების რეფორმების პაკეტის განხილვაში აუცილებლად მივიღებთ მონაწილეობას. გუშინდელი წარუმატებელი დღის ერთადერთი კარგი მომენტი იყო ის, რაც ბატონმა კობახიძემ და „ქართულმა ოცნებამ“ საჯაროდ თქვა, მანამდე იგივე ითქვა შეხვედრაზე - კობახიძემ თქვა, რომ პირობას დებს, მოლაპარაკების გარეშეც, ამაზე პარლამენტში ვიმსჯელებთო, ამ სიტყვას უნდა ჩავეჭიდოთ, ეს სიტყვა რეალობად უნდა იქცეს და მართლმსაჯულების რეფორმის რეალური პაკეტი უნდა მივიღოთ,"- განაცხადა ელისაშვილმა.
ამასთან, კითხვაზე, თუ ვინ ჩაშალა მოლაპარაკებები, ელისაშვილი აცხადებს, რომ „ქართული ოცნება" ამბობდა, რომ გარკვეული დათქმით მზად იყო ხელი მოეწერა დოკუმენტისთვის. ოპოზიციის მცირე ნაწილი მზად იყო, რომ უპირობოდ მოეწერა ხელი, ხოლო ოპოზიციის დიდი ნაწილი ამბობდა, რომ არც ერთ შემთხვევაში არ მოაწერდა ხელს.