ჩვენი გუნდის ძლიერი მხარეა ის, რომ კონკრეტულ სახელსა და გვარებზე დამოკიდებული არ ვართ - "ქართული ოცნება" ძლიერ ინსტიტუტებზეა დამოკიდებული, - ეს განცხადება უმრავლესობის წევრმა რატი იონათამიშვილმა ფინანსთა მინისტრის თანამდებობიდან ვანო მაჭავარიანის გადადგომის შესახებ დასმული კითხვის პასუხად გააკეთა.

როგორც იონათამიშვილმა აღნიშნა ვანო მაჭავარიანთან ხშირად ჰქონდათ ძალიან ცხარე კამათი სხვადასხვა საკითხების ირგვლივ, თუმცა ასევე აქვს მასთან პოზიტიური თანამშრომლობის გამოცდილება.

"ირაკლი ღარიბაშვილის ლიდერობით აღმასრულებელი ხელისუფლება აქტიურად მუშაობს ქვეყნის ეკონომიკური სირთულეებიდან გამოყვანაზე. დარწმუნებული ვარ, მთავრობის ინიციატივები წარმატებული იქნება", - განუცხადა რატი იონათამიშვილმა ჟურნალისტებს.

ცნობისთვის, ფინანსთა მინისტრი ივანე მაჭავარიანი თანამდებობას ტოვებს. შესაბამისი განცხადება მაჭავარიანმა სოციალურ ქსელში გამოაქვეყნა. მაჭავარიანი არ ასახელებს თანამდებობის დატოვების მიზეზს, მაგრამ განმარტავს, რომ პოსტიდან წასვლას ჯერ კიდევ გასული წლის ბოლოს გეგმავდა, თუმცა გამომდინარე იქიდან, რომ წინ იყო კრიზისული ბიუჯეტის დამტკიცების პროცედურა, ასევე, მნიშვნელოვანი მოლაპარაკებები საერთაშორისო სავალუტო ფონდთან პროგრამის დასრულების თაობაზე, გადაწყვეტილება რამდენიმე თვით გადადო.