„ნაციონალური მოძრაობის“ წევრის გიორგი კაპანაძის განცხადებით, თბილისის უბნებში ელექტროენერგია ითიშება, რათა მოქალაქეებმა აქციაზე მისვლა ვერ შეძლონ.
როგორც კაპანაძემ განაცხადა, ამ ვითარებიდან გამოსავალი იქნება მხოლოდ ის, რომ რუსი ჟურნალისტი ვლადიმერ პოზნერი საქართველოდან რაც შეიძლება მალე გაიყვანონ.
„მოგვაწოდეს ინფორმაცია, რომ ვაზისუბანი ჩააბნელეს. ეს გააკეთეს იმიტომ, რომ ადამიანები არ შემოუერთდნენ სამართლიან პროტესტს. როგორც ჩანს, სხვა უბნებსაც თიშავენ, ეს არ არის გამოსავალი. გამოსავალი არის ის, რომ პოზნერი და ოკუპანტები ჩასვან თეთრ ავტობუსში და გააბრუნონ ოკუპანტ ქვეყანაში. მაგრამ, სამწუხაროდ, „ქართული ოცნება“ გადაქცეულია „რუსულ ოცნებად“. არაფერი საფიქრალი არაა - პოზნერი რაც შეიძლება ოპერატიულად უნდა გაიყვანონ საქართველოს ტერიტორიიდან“,- განაცხადა გიორგი კაპანაძემ.
ამასთან, მისი თქმით, აქვს ინფორმაცია, რომ ხელისუფლების წევრები პოზნერის გაფრენის თაობაზე კონსულტაციებს უკვე მართავენ.
„როგორც ვიცი, ფიქრობენ, რომ ჩარტერით გააფრინონ უკან, ვიმედოვნებ ამას რაც შეიძლება მალე გააკეთებენ.
შედგა საუბარი - საქართველოს ხელისუფლების წევრებს შორის გაიმართა კონსულტაციები. თუ ამ გადაწყვეტილებას მიიღებენ, ეს იქნება გონივრული“,- განაცხადა გიორგი კაპანაძემ.