საქართველოში მიღებულია გადაწყვეტილება, რომ ამ ეტაპზე ვაქცინაცია ნებისმიერი ვაქცინით, რაც ქვეყანაში შემოვა, დაშვებული იქნება 18 წლის ასაკიდან პირებზე, - ამის შესახებ დაავადებათა კონტროლის ეროვნული ცენტრის გადამდებ დაავადებათა დეპარტამენტის ხელმძღვანელმა, ხათუნა ზახაშვილმა განაცხადა, როდესაც უპასუხა „ინტერპრესნიუსის“ კითხვას, რომლის თანახმად, „ფაიზერის“ ახალი კვლევით ვაქცინაცია 16 წლის ასაკიდან პირებში დასაშვებია, ჩვენთან კი 18 წლამდე პირების ვაქცინაცია აკრძალულია და ხომ არ იგეგმება ზღვარის დაწევა 16 წლამდე.

მისი თქმით, მოვლენების განვითარების მიხედვით შესაძლებელია, რომ მოხდეს ასაკის ზღვარის დაწევა ვაქცინაციასთან დაკავშირებით, თუმცა ამ ეტაპზე არ იგეგმება.

„ფაიზერისთვის“, ახალი კვლევებით, თავიდანვე იყო შესაძლებლობა, რომ ადამიანები 16 წლიდან აცრილიყვნენ. თავიდანვე ვაქცინაზე 16 წლის ასაკის ადამიანებზე ჩატარდა კვლევები. ზოგიერთ ქვეყანაში ამ ვაქცინისთვის დასაშვებია ასაკი 16 წლიდან, საქართველოში მიღებულია გადაწყვეტილება, რომ ამ ეტაპზე ვაქცინაცია ნებისმიერი ვაქცინით, რაც ქვეყანაში შემოვა, დაშვებული იქნება 18 წლის ასაკის ზევით პირებზე.

შესაძლებელია, რომ მოვლენების განვითარების მიხედვით მოხდეს ასაკის ზღვარის დაწევა, მაგრამ არა ამ ეტაპზე“ , - განაცხადა ზახაშვილმა.