პირადი შეხედულებები და მოსაზრებები, საქართველოში შემოსვლისა და გასვლის ნებართვაზე გავლენას ვერ ახდენს - ეს ასეა დღევანდელი კანონით, - ამის შესახებ პარლამენტის ადამიანის უფლებათა დაცვის კომიტეტის თავმჯდომარემ მიხეილ სარჯველაძემ რუსი ჟურნალისტის ვლადიმერ პოზნერის საქართველოში ჩამოსვლასთან დაკავშირებით დასმული კითხვის პასუხად განაცხადა.
“ვლაპარაკობთ იმაზე, რომ საზღვარზე მყოფი მოხელე ვალდებულია, შეაფასოს თითოეული ჩამომსვლელი, მის მიერ გავრცელებული შეხედულებების მიხედვით და ამის შემდეგ მიიღოს გადაწყვეტილება მის შემოშვება-არშემოშვების შესახებ. ეს არის მცდარი და არასწორი მოსაზრება“, - აცხადებს მიხეილ სარჯველაძე.
ცნობილი რუსი ჟურნალისტი ვლადიმერ პოზნერი საქართველოში სტუმრებთან ერთად დაბადების დღის აღსანიშნავად ჩამოვიდა, თუმცა ქართველი აქტივისტების პროტესტის გამო, ის იძულებული გახდა თბილისი ვადაზე ადრე, ჩარტერული რეისით დაეტოვებინა.