პარტია „ქართული ოცნება - დემოკრატიული საქართველოს“ ცენტრალურ ოფისში საპარლამენტო უმრავლესობის სხდომა მიმდინარეობს.
სხდომაზე ქვეყანაში შექმნილ პოლიტიკურ სიტუაციაზე იქნება საუბარი. მმართველი გუნდის წარმომადგენლები სავარაუდოდ, 7 ევროპარლამენტარის მიერ გავრცელებულ განცხადებაზეც იმსჯელებენ, რომელშიც ისინი არ გამორიცხავენ, რომ საქართველოსთვის ევროკავშირის ფონდებიდან ფინანსური დახმარების შეჩერების მოწოდებას გააკეთებენ.
უმრავლესობის სხდომამდე პარტიის ოფისში პოლიტსაბჭოს სხდომა გაიმართა.
სხდომების პარალელურად, პარტიის ოფისთან სამოქალაქო აქტივისტების აქცია მიმდინარეობს. აქციის მონაწილეებს ადგილზე მავთულხლართები აქვთ მიტანილი.
ამასთან, ისინი ადგილზე იმყოფებიან შემდეგი შინაარსის პლაკატებით: „აფხაზეთი საქართველოა“ , „რუსული ოცნება“, „დიდება გმირებს“.
სიტუაცია მმართველი პარტიის ოფისთან რამდენჯერმე დაიძაბა. დაკავებულია 13 აქტივისტი წვრილმანი ხულიგნობის და პოლიციის კანონიერი მოთხოვნისადმი დაუმორჩილებლობის ბრალდებით. ისინი საპატრულო პოლიციის დეპარტამენტში გადაიყვანეს.
ადგილზე ამ დრომდეა მობილიზებული საპატრულო პოლიციის ეკიპაჟები.