აქტივისტებმა თბილისის საქალაქო სასამართლოსთან აქცია-პერფორმანსი გამართეს.

მოძრაობა „შეცვალეს“ წევრებმა ადგილზე ბანერები მიიტანეს წარწერით „ვოლსკის სამართლის კოდექსი", რითაც საქართველოს პარლამენტის ვიცე-სპიკერის გია ვოლსკის შეურაცხმყოფელ ჟესტს აპროტესტებენ.

„გუშინ, როცა ვოლსკიმ მოგვაყენა შეურაცხყოფა, ჩვენი მოძრაობიდან დაგვაკავეს ცამეტი აქტივისტი, ამ კოდექსით გვასამართლებენ. ამ კოდექსში წერია, რომ ყველა მოქალაქე თანასწორია, თუმცა გია ვოლსკი-გავრილოვი უფრო თანასწორია“,- აცხადებს აქტივისტი.

ცნობისთვის, სამართალდამცავებმა გუშინ პარტია „ქართული ოცნება - დემოკრატიული საქართველოს” ცენტრალურ ოფისთან 13 პირი დააკავეს. აქტივისტების ინფორმაციით, დაკავებები მას შემდეგ დაიწყო, რაც „ქართული ოცნების” ოფისთან უმრავლესობის წევრის გია ვოლსკის გამოჩენას ხმაური მოჰყვა. მას შემდეგ, რაც გია ვოლსკის აქტივისტებმა „მონა" უწოდეს, მმართველი გუნდის დეპუტატმა აქტივისტების მისამართით შეურაცხმყოფელი ჟესტი გამოიყენა.