3 თვეში უკანონო თევზჭერის 52 ფაქტი გამოვლინდა

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლებმა, 2021 წლის 01 იანვრიდან დღემდე, უკანონო თევზჭერის 52 ფაქტი გამოავლინეს, მათ შორის 3 ფაქტი სისხლის სამართლის დანაშაულის ნიშნებს შეიცავს. ამის შესახებ „ინტერპრესნიუსს“ გარემოსდაცვითი ზედამხედველობის დეპარტამენტიდან აცნობეს.

მათივე ინფორმაციით, უმეტეს შემთხვევაში, სამართალდამრღვევები თევზის მოპოვებას თევზჭერის აკრძალული საშუალებების - სახლართი ბადეებისა და ე.წ. ელექტროშოკური აპარატების გამოყენებით ახდენდნენ.

„გარემოსდაცვითი ზედამხედველობის დეპარტამენტის თანამშრომლების მიერ, ჯამში, ამოღებულია 8 და დალუქულია 23 ერთეული მასობრივი განადგურების საშუალება. ასევე, 2000 მ სიგრძის სახლართი ბადეც დალუქულია.

უკანონო თევზჭერის ყველაზე მეტი - 15 ფაქტი გამოვლინდა აღმოსავლეთის რეგიონული სამმართველოს სამოქმედო ტერიტორიაზე. დასავლეთის რეგიონული სამმართველოს თანამშრომლების მიერ გამოვლენილია 9 ფაქტი, სამცხე-ჯავახეთში დაფიქსირდა უკანონო თევზჭერის 6 ფაქტი, ქვემო ქართლში - 4, სამეგრელო-ზემო სვანეთშიც - 4, კახეთში - 1, აჭარისა და გურიის რეგიონული სამმართველოს სამოქმედო ტერიტორიაზეც - 1.

გარემოსდაცვითი ზედამხედველობის დეპარტამენტის შავი ზღვის კონვენციური სამმართველოს თანამშრომლების მიერ, გამოვლენილია უკანონო თევზჭერის 7 ფაქტი.

რაც შეეხება დედაქალაქს, 2021 წლის 1 იანვრიდან მარტის ჩათვლით, თბილისში, უკანონო თევზჭერის 5 ფაქტი გამოვლინდა.

უკანონოდ მოპოვებული თევზის ოდენობამ, დაახლოებით, 22 კგ შეადგინა. უკანონო თევზჭერის იარაღები დაილუქა, საქმის მასალები გადაგზავნილია შესაბამის უწყებებში.

ბრაკონიერობის წინააღმდეგ ბრძოლა, გარემოსდაცვითი ზედამხედველობის დეპარტამენტისთვის პრიორიტეტია. უკანონო თევზჭერის აღკვეთის მიზნით, გარემოს დაცვისა და სოფლის მეურნეობის სამინისტროს და გარემოსდაცვითი ზედამხედველობის დეპარტამენტის შესაბამისი სამსახურები არსებული რეგულაციების გამკაცრების საკანონმდებლო ინიციატივებზე მუშაობენ, რომლებსაც უახლოეს მომავალში საქართველოს პარლამენტს წარუდგენენ“,- ნათქვამია ინფორმაციაში.

ემილ ავდალიანი - სამხრეთ კავკასიის რეგიონმა დიდი ძალების მეტოქეობის ხანაში შეაბიჯა, დღეს თამაშის ახალი წესები ყალიბდება,  მტკივნეული და გარდამავალი პერიოდია
ქართული პრესის მიმოხილვა 12.04.2021
როგორ ჩატარდება ერთიანი ეროვნული გამოცდები? - შარშანდელ რეკომენდაციებში შესაძლოა, კორექტირება შევიდეს - ინტერვიუ სოფიო გორგოძესთან
გიორგი კეკელიძის ახალი ინიციატივა: აპრილი წიგნის ჩუქების თვედ გამოცხადდეს
ვასილ ხოდელი - ლიბერთის ნებისმიერი სესხი გაიცემა საბაზრო პირობებით