დღეს ქრისტეს ბრწყინვალე აღდგომას სომეხთა სამოციქულო მართლმადიდებელი ეკლესიის წარმომადგენლები ზეიმობენ. თბილისის სურბ ეჩმიაძინის ტაძარში საზეიმო წირვა არქიმანდრიტმა ზავენ იაზიჩიანმა აღავლინა. ამის შესახებ „ინტერპრესნიუსს“ რელიგიის საკითხთა სახელმწიფო სააგენტოდან აცნობეს.
მათივე ცნობით, საზეიმო წირვას საქართველოში სომეხთა ეკლესიის ეპარქიის წინამძღვარი, არქიმანდრიტი კირაკოს დავთიანი ესწრებოდა.
„სომეხ თანამოქალაქეებთან აღდგომის დღესასწაულის მისალოცად საქართველოს პარლამენტის წევრი, სოზარ სუბარი მივიდა.
რელიგიის საკითხთა სახელმწიფო სააგენტოს თავმჯდომარემ, ზაზა ვაშაყმაძემ საქართველოს მთავრობის, რელიგიის სააგენტოს სახელით აღდგომა მიულოცა, წინსვლა და კეთილდღეობა უსურვა სომეხთა სამოციქულო ეკლესიის სასულიერო დასსა და ჩვენს სომეხ თანამოქალაქეებს. საზეიმო წირვას ესწრებოდნენ რელიგიის საკითხთა სახელმწიფო სააგენტოს თავმჯდომარის მოადგილე, გიორგი უკლება და სააგენტოს სამართლებრივი უზრუნველყოფის სამსახურის თანამშრომელი, სანდრო შეყილაძე“,- ნათქვამია ინფორმაციაში.