საპარლამენტო უმრავლესობის წევრის მიხეილ სარჯველაძის აზრით, თუკი პარლამენტი კვლავ არ დააკმაყოფილებს ოპოზიციონერი დეპუტატების განცხადებებს სადეპუტატო უფლებამოსილების შეწყვეტის თაობაზე, ასეთი გადაწყვეტილება კონსტიტუციასთან და რეგლამენტთან წინააღმდეგობაში არ მოვა.
„მესმის, რომ ოპოზიციას დიდი სურვილი აქვს მათ მიერ ინსპირირებული ხელოვნური კრიზისი რეალურ კრიზისში გარდაიქმნას. ხელისუფლების მხრიდან გადადგმული ნაბიჯები იმ რეალობის შესაბამისი იქნება, რაც ქვეყნის ინტერესისთვის არის ოპტიმალური და საჭირო და არა კონკრეტული პარტიებისა და მათი გეგმებისათვის", - აღნიშნა სარჯველაძემ ჟურნალისტებთან საუბრისას.
როგორც ოპოზიციაში აცხადებენ, მათ სადეპუტატო მანდატების გაუქმების მოთხოვნით, შესაძლოა, პარლამენტს კიდევ ერთხელ მიმართონ.