ყველა იმ ოპოზიციური პარტიისთვის, ვინც მიხეილ სააკაშვილის მიერ შექმნილი მოჯადოებული წრიდან გამოვა, მოლაპარაკების კარი ღიაა,- ამის შესახებ საპარლამენტო უმრავლესობის წევრმა დავით მათიკაშვილმა ჟურნალისტებს განუცხადა. როგორც მან აღნიშნა, აუცილებელია, რომ პარტიებმა გადაწყვეტილებები ზეპარტიული ინტერესების საფუძველზე მიიღონ.
„გირჩთან" და არა მხოლოდ „გირჩთან", ყველა იმ ოპოზიციურ პარტიასთან, ვინც გამოვა მიხეილ სააკაშვილის მიერ შექმნილი მოჯადოებული წრიდან, რეალურად დაინახავს პრობლემების გადაწყვეტის გზებს და შეაფასებს საკუთარ შესაძლებლობებს, რა თქმა უნდა, მოლაპარაკების კარი ღიაა. იყო გაკეთებული განცხადებაც, რომ თუკი ამას „ნაციონალური მოძრაობა" გააკეთებს და კიევიდან მიღებული დირექტივების ნაცვლად, თბილისის მოცემულობიდან და რეალობიდან გამოვა და ქვეყნისთვის უკეთეს გადაწყვეტილებას მიიღებს, ცხადია, „ნაციონალურ მოძრაობასთანაც" ღიაა მოლაპარაკების კარი. ოღონდ ცხადია, ეს ყველაფერი უნდა იყოს ზეპარტიული ინტერესებით და არავინ უნდა იყოს შებორკილი იმ ცრუ ამბიციებით, რომელსაც არანაირი საფუძველი არ გააჩნია,"- განაცხადა მათიკაშვილმა.