შოთა რუსთაველის საქართველოს ეროვნულმა სამეცნიერო ფონდმა საქართველოში იტალიის საგანგებო და სრულუფლებიან ელჩს, ენრიკო ვალვოს უმასპინძლა.
როგორც „ინტერპრესნიუსს“ შოთა რუსთაველის საქართველოს ეროვნული სამეცნიერო ფონდიდან აცნობეს, შეხვედრაზე ფონდის გენერალურმა დირექტორმა, ჯაბა სამუშიამ იტალიის ელჩს ფონდის საქმიანობა გააცნო და როგორც იტალიელი, ასევე ქართველი მკვლევარების სამეცნიერო კვლევაში თანამშრომლობის მხარდაჭერის მნიშვნელობაზე ისაუბრა.
„მხარეებმა საქართველოსა და იტალიას შორის ამჟამად არსებული სამეცნიერო თანამშრომლობის სქემები მიმოიხილეს და მკაფიოდ დააფიქსირეს ორ ქვეყანას შორის სამეცნიერო თანამშრომლობის გაღრმავების აუცილებლობა.
შეხვედრაზე, იტალიის ელჩმა ფონდსა და იტალიის კვლევების ეროვნულ საბჭოს შორის არსებული თანამშრომლობა და სამომავლო პერსპექტივები განიხილა. მხარეებმა ხაზგასმით დააფიქსირეს ორმხრივი საგრანტო სქემის გაფართოების მნიშვნელობა და სამომავლო თანამშრომლობის გაძლიერების მზაობა გამოთქვეს“, - აღნიშნულია ინფორმაციაში.