ჯერჯერობით ვერ ვხედავ ცვლილებებს იმაში, რამაც მოლაპარაკებას ხელი შეუშალა - „ქართული ოცნების“ და „ნაციონალური მოძრაობის“ ვნებებში ერთმანეთს ეჩხუბონ , - ამის შესახებ „გირჩის“ ერთ-ერთმა ლიდერმა იაგო ხვიჩიამ „პალიტრა ნიუსის“ გადაცემაში „360 გრადუსი“ განაცხადა, როდესაც ისაუბრა ხელისუფლებასა და ოპოზიციის მოლაპარაკებებზე.

მისი თქმით, „ამ ხალხს მოლაპარაკება არ უნდა“. შეუთანხმებლობის მიზეზი გულწრფელობის ნაკლებობაა, როცა მხარეები არ ამბობენ, მართლა რა უნდათ.

ხვიჩიას განმარტებით, „გირჩი“ დაიღალა და სურთ, რომ „რაღაც დაამთავრონ“.

„მეორე მხარის დამარცხება რომ უნდათ, გასაგებია. ოღონდ, დამარცხების ადგილი მოლაპარაკების მაგიდა არ არის. „ქართული ოცნების“ დამარცხებასთან დაკავშირებით ჩვენს საქმეს ჩვენი პარტნიორები არ გააკეთებენ, ეს ჩვენი გასაკეთებელია, არა მოლაპარაკების მაგიდასთან, არამედ სხვაგან, სადაც მოლაპარაკებით უნდა მივიდეთ. ეს უნდა გავიგოთ, თორემ ისე რამდენიც გინდა ილაპარაკე, სადღეგრძელოსავით არის. ამიტომ ჩვენ დავიღალეთ, ფიზიკურად დავიღალეთ და გვინდა რაღაც დავამთავროთ - ვთქვათ: ჩვენ ამ რეჟიმში ვართ. თუ შეთანხმდებით, კი ბატონო, ყველაფერი კარგად იქნება, თქვენ გენაცვალეთ, შემოგიერთდებით, მაგრამ თუ ვერ თანხმდებით, ჩვენ ასეთი გეგმები გვაქვს“, - განაცხადა ხვიჩიამ და დასძინა, რომ გეგმებზე ვერ ისაუბრებს, რადგან აღნიშნულზე „გირჩის“ ახალ ჯგუფში „გირჩის სამეფოში“ უნდა დაიწყონ დისკუსია.