„ნაციონალური მოძრაობის“ ლიდერებმა და წევრებმა 9 აპრილის მემორიალი გვირგვინით შეამკეს და დაღუპულ გმირებს პატივი მიაგეს.
როგორც „ნაციონალური მოძრაობის“ წევრი, აკაკი მინაშვილი აცხადებს, 9 აპრილი თავისუფლებისთვის ბრძოლის სიმბოლოა.
„9 აპრილი საქართველოს ისტორიაში, ალბათ, ერთ-ერთი ყველაზე მნიშვნელოვანი და გადამწყვეტი დღეა. ეს იყო დღე, როდესაც ჩვენმა მოქალაქეებმა ანახეს უპრეცედენტო ბრძოლის მაგალითი, ეს იყო თავისუფლებისთვის ბრძოლის სიმბოლო. ამავე დროს, ეს არის საქართველოს დამოუკიდებლობის აღდგენის დღე. ყველას კარგად უნდა გვესმოდეს, რომ ეს ბრძოლა გრძელდება და მუდმივია. ყველა თაობამ უნდა იკისროს ამ ბრძოლაში მონაწილეობის პასუხისმგებლობა“, - აცხადებს მინაშვილი.
შეგახსენებთ, რომ 1989 წლის 9 აპრილის ტრაგედიიდან 32 წელი შესრულდა. 1989 წლის 9 აპრილს, გამთენიისას, საბჭოთა კავშირის შეიარაღებული ძალების ნაწილებმა თბილისის ცენტრში, პარლამენტის შენობასთან, მშვიდობიანი საპროტესტო აქცია დაარბიეს, რასაც მსხვერპლი მოჰყვა.