ჩვენ იმას ვამტკიცებთ და ეს ასეც არის, რომ "ნაციონალური მოძრაობის" ხელისუფლების პირობებში ომი არ დაწყებულა და ცხინვალი არ დაბომბილა, ხოლო თავად წინა ხელისუფლების წარმომადგენლები ამტკიცებენ, რომ საკუთარი მოსახლეობა კასეტური ბომბებით დაბომბეს, - ამის შესახებ პარლამენტში უმრავლესობის წევრმა გურამ მაჭარაშვილმა განაცხადა.
მაჭარაშვილის თქმით, "ოპოზიციის რადიკალური ფრთა იმ დონეზე მივიდა, რომ ქვეყნის შიგნით თუ გარეთ სალანძღავი მიზნები ამოწურა და ახლა თვითგვემაზე გადავიდა".
"დარწმუნებული ვარ, ჩვენი ევროპელი მეგობრები მათ განცხადებებს სერიოზულად არ აღიქვამენ. ეს არის მათი თვითგვემის პროცესი. მათივე ამომრჩრევლებისთვისაც კატეგორიულად მიუღებელ განცხადებებს აკეთებენ. ჩვენ მაინც შევძლებთ ქვეყნის ინტერესების დაცვას ჰააგის სასამართლოში და ზოგადად, საერთაშორისო ასპარეზზე, თუმცა როგორი იქნება ჩვენი რადიკალური ოპონენტების ბედი, ამას ოქტომბერში ვნახავთ", - განაცხადა გურამ მაჭარაშვილმა.