პარლამენტი და მთავრობა მთლიანად გადართული და ორიენტირებულია პრობლემების მოგვარებასა და იმ სამუშაოზე, რაც საზოგადოების საჭიროებებს პასუხობს, - ამის შესახებ პარლამენტის ბიუროს სხდომაზე, პარლამენტის თავმჯდომარემ არჩილ თალაკვაძემ განაცხადა.
„პოლიტიკური მოლაპარაკებების გარდა, ჩვენთვის ძალზედ პრიორიტეტულია, ვუპასუხოთ ეკონომიკურ გამოწვევებს, ვუპასუხოთ საზოგადოებრივი ჯანდაცვის საჭიროებებს, რაც დღეს ქვეყანაში დგას“, - აღნიშნა თალაკვაძემ.
გარდა ამისა, დღეს პარლამენტის თავმჯდომარემ საზოგადოებას მიმართა თხოვნით, ეპიდემიოლოგიური უსაფრთხოების გათვალისწინებით, ჯანდაცვის სამსახურების რჩევები და რეკომენდაციები ზედმიწევნით დაიცვან.
„პირველ რიგში, ვიდრე ვაქცინაცია დასრულდება - ეს არის დისტანციის დაცვა და პირბადის გამოყენება ნებისმიერი ახლო კონტაქტის დროს. ეს დაგვეხმარება, მინიმალური ახალი შემთხვევებით გავიაროთ პერიოდი, ვიდრე ვაქცინაცია დასრულდება“, - განაცხადა არჩილ თალაკვაძემ ბიუროს დღევანდელ სხდომაზე.