სასამართლოს აქვს ყველანაირი მექანიზმი, რომ ნიკა მელია გამოუშვას საპატიმროდან, მათ შორის, აღკვეთის ღონისძიების გარეშე,- ამის შესახებ „მოქალაქეების“ ერთ- ერთმა ლიდერმა, პარლამენტის ვიცე-სპიკერმა ლევან იოსელიანმა ჟურნალისტებთან განაცხადა.
მისი თქმით, მელიას გათავისუფლება ცალსახად ხელს შეუწყობს მოლაპარაკებების გაგრძელებას და მის პოზიტიურ დასრულებას.
„მიმაჩნია, რომ ეს პროცესი რაც უფრო მალე დასრულდება და დასრულდება ნიკა მელიას გათავისუფლებით, ეს მხოლოდ ხელს შეუწყობს იმას, რომ პოლიტიკური კრიზისის დაძლევისკენ ნაბიჯები კიდევ უფრო აქტიურად გადაიდგას და საბოლოოდ მივაღწიოთ შეთანხმებას, რადგან როცა ყველაზე დიდი ოპოზიციური პარტიის თავმჯდომარე ციხეშია, ეს არის ნებისმიერ მოლაპარაკებაში ძალიან დიდი წინააღმდეგობის წინაპირობა. ეს საკითხი თუ არ გადაიჭრება, ეჭვი მეპარება, რომ მოლაპარაკება საბოლოო ჯამში საერთოდ შედეგიანი გამოდგეს,"- განაცხადა იოსელიანმა.